Udaltzaingoaren ereduari buruz eztabaidatzeko eskaera erregistratu zuen iragan astean Amurrioko EH Bildu udal taldeak. Bi alor nagusiren inguruan eztabaidatu nahi dute nagusiki: Udaltzaingoaren araudi baten beharra eta Herritarren Segurtasunerako alor baten sorrera.
Izan ere, Amurrioko Udaltzaingoa 14 polizia agentek osatzen duten arren, ez dago gorputzaren jarduna arautzen duen ordenantza edo erreglamendurik.
Herritar Segurtasunerako alorra
Alor horren sorrera da EH Bilduk erregistratutako mozioko proposamen nagusietako bat. Gainerako udal batzordeek duten maiztasun bera eta Udaltzaingoaren arduradunen parte hartzea izango luke alorrak.
Halaber, parte-hartze foro bat sortzea ere jarri dute mahai gainean, "arazoak identifikatzea, lehentasunak zehaztea eta ezarritako udal politiken eraginkortasuna aldian-aldian ebaluatzea" helburu lituzkeena .
Polizia-eredua eztabaidagai
"Hurbiltasuneko" polizia-eredu baterantz urratsak ematea da EH Bilduren asmoa, eta bide horretako urrats bezala definitu ditu aurkeztutako proposamen eta eztabaidagaiak. EH Bilduren iritziz, prebentzioan oinarritutako eredu bat da hori, "zigortzeko esku-hartzeak eta isunak murriztuz".
“Bizikidetza harmonikoa bilatu behar dugu, hain funtsezkoa den zerbitzu batekin. Horretarako, bizilagunek egoeraren diagnostikoan, jardueren diseinuan eta haien eraginkortasunaren ebaluazioan parte hartzeko prozesua ireki behar dugu. Helburua da herritarrekin batera lan egitea, entzunez, informatuz, heziz, konbentzituz eta, azken batean, hurbileko eta auzotarrentzako udaltzain-eredu bat lagunduz”, adierazi du Iñaki Ibarluzea EH Bildu Amurrioko bozeramaileak.
Udaltzaingoak herritarren iritzia eta gogobetetze-maila ezagutu behar dituela azpimarratu du Ibarluzeak, “elkarreragin eta lankidetza horretatik guztiok erosoago egongo garen harreman bat sortuko da”.