Abadiñon jokatu zen Euskadiko Trail Txapelketaren aurtengo edizioa, Sekulebedarra kirol klubak antolatutako 21 kilometrotako froga. Oinkariak atletismo taldeko Ekain Usategi eta Mikel Aingeru Letonak parte hartu zuten bertan.
Ekain Usategi gazteak bere lehenengo lasterketa zuen Abadiñokoa, urtebete baitarama traila praktikatzen. "Sentsazio oso onekin hasi nuen lasterketa", adierazi du Usategik, "lehenengo kilometroak oso azkarrak izan ziren, baina horrek ez ninduen baldintzatu nire erritmora jarraitzerako orduan".
Usategik 2. postua lortu zuen 23 urte azpikoen kategorian. "Nire burua lasterketa batean frogatzera joan nintzen bakarrik, baina oso pozik nago lortutako emaitzarekin", azaldu du korrikalari amurrioarrak, "aurrera jarraitzeko motibazioa eman dit honek, naiz eta hobetzeko gauza asko ditudan oraindik".
Mikel Aingeru taldekidea 32. postuan helmugaratu zen.
Lasterketa gehiago
Abadiñokoa ez zen izan Oinkariak taldeko kideek asteburuan eginiko lasterketa bakarra. Larunbatean Arabako pista txapelketa jokatu zen Gasteizen. Pablo Mas, Jon Llano, David Castro, Guillermo Lopez eta Alberto Vacelar lasterkariak 5.000 metroko proban lehiatu ziren eta laugarren, zortzigarren, bederatzigarren, hamaikagarren eta hamabigarren postuak eskuratu zituzten, hurrenez hurren.
Laudioko Atletismo Klubeko ordezkaritza zabal bat ere bertaratu zen Gasteizko hitzordura, hainbat kategorietan parte hartzeko asmoz. Iñaki Galindez urrezko domina batekin itzuli zen etxera eta Koldo Ayestak zilarrezko domina eskuratu zuen.
Laudioko Atletismo Klubeko kideek oso positiboki baloratu dute asteburuko jarduna: "asteburu bikaina izan da klubarentzako!".