Udal ekipamenduen plan zuzentzailea aurkeztu zuen atzo Amurrioko Udalak. Eraikin eta instalazioen egoera eta erabileraren azterketa burutu eta horiek optimizatzeko proposamen arriko dute mahai gainean. Udal, kirol eta kultura ekipamenduen eta adinekoei zuzendutako azpiegituren sare zabala du Amurriok, agerraldian azaldu zutenez. Hain zuzen ere, sare horren guztiaren erabilera eta egoera izango dira diagnostikoaren aztergai nagusiak.
"Elkarrekintzarako espazioak dira, leku inklusiboak izan behar dira, eta bertan, erabiltzaileen erosotasuna eta ongizatea ez ezik, beste irizpide batzuk ere hartu behar ditugu kontuan, hala nola irisgarritasuna, erosotasuna, autonomia eta segurtasuna edo balioaniztasuna", azaldu du Txerra Molinuevo alkateak.
Parte hartzea ardatz
Herritarren parte hartzea izango da diagnostikoaren ardatz nagusietako bat. Atzo bertan 14 galderaz osatutako galdetegia banatzeari ekin zioten Amurrioko auzokide guztien artean, bizilagunek udal-ekipamenduen balorazioa egin eta euren iritziak jasotzeko helburuarekin. Galdetegiak udaletxean, kultur etxean, udal liburutegian eta Bañueta kiroldegian utzi ahalko dira, uztailaren 6ra arte.
Internet bidez ere egongo da galdetegia betetzeko aukera, www.amurrio.eus atarian bertan. Gainera, ekainaren 25ean eta uztailaren 2an postua jarriko dute ostiraleko merkatuan, galdetegiak bete eta plan zuzentzailearen inguruko argibideak eskaintzeko.
Parte hartze prozesuarekin batera, azterketa teknikoa ere gauzatuko da. Udalak arkitekto talde bat osatuko du prozesu horretan, ekarpena egin dezan.
Diagnostiko-faseari amaiera emateko, hiru saio sektorial aurreikusi dituzte uda sasoitik bueltan. Kultura, kirola eta asistentzia jorratuko dituzte. Herriko eragile zein norbanakoei zuzenduak egongo dira saioak. Behin ekarpen guztiak jasota, planaren erredakzioari helduko diote, eta berriz ere teknikari, udal talde politiko eta herritarrekin landuko dute proposamena.