Oinkariak atletismo taldeak udako kirol erronka egingo du aurten ere, elkartasuna helburu. Hain zuzen, Tubacexeko grebalarien erresistentzia kutxaren aldeko ekimena izango da. Parte hartzeko izena eman beharra dago hemen.
Amurrioko zirkuituari 3 itzuli egingo zaizkio (5 km). Txapelketari ikuspegi solidarioa emango diogu; izan ere, dortsalak banatuko ditugu, 5 euroko prezioan, eta hartutakoa AIARALDEKO ERRESISTENTZIA KUTXArentzat izango da, une honetan TUBACEXeko langileak kudeatzen ari baitira.
— oinkariak amurrio (@oinkariak) June 19, 2021
Zehazki, baldintza gutxi daude erronka egiteko; izena ematea eta 5 euroko gutxieneko inskripzioa ordaintzea -hortik gora nahi beste ordaindu daiteke, elkartasun ekimena baita-, dortsala jasotzea, 5 kilometroko ibilbidea osatzea Reforren eta Strava aplikazioa baliatzea marka jasotzeko. Aplikazio hori baliatuko dute Oinkariak taldekoek sailkapena egiteko. Aplikazioa sakelakoan edo bestelako gailu batean deskarga daiteke.
Inskripzioa
Izena emateko epea ekainaren 25ean agortuko da eta hurrengo bi egunetan banatuko dituzte dortsalak Reforren, taldearen egoitzan. Ibilbidea egiteko tartea, aldiz, astebetekoa izango da. Ekainaren 28an hasiko da uztailaren 4an bukatzeko. Iaz erronkak 10 kilometroko ibilbidea zuen, baina aurten erdira murriztu dute, herrikoiagoia izan dadin.
Kategoria bakoitzeko lehen hiru sailkatuei saria emango diete eta sare sozialetan argitaratuko dituzte datu guztiak atletismo taldeko arduradunek.