Success, Uxue, June, Josu, Izar, Xabi, Jon eta Izaro dira. Ikasturte osoa igaro dute Maied Urrutia amurrioarrarekin batera argazkigintzan sakontzen, Kultur Etxean egin duten ikastaroan. “Sormen bisuala” da ikastaroaren izena; izan ere, kameraren aspektu teknikoak ezagutzeaz gain irudimena aireratzen utzi eta argiarekin jolasten eta artelanak sortzen aritu dira.
“Ikastaroaren hasieran powerpoint bidez kameraren parteei eta argiari buruzko teoria klaseak jaso genituen” azaldu du Successek, argiaren portaera ulertzea ezinbestekoa baita hau kamera batekin ehizatu eta nahieran manipulatzeko. Ezin hobeto ezagutzen dituzte orain “argia harrapatzeko” tramankuluaren gorputzeko atalak eta honen mekanismoak, Xabik banan banan aletu dizkigu: “Argia objektibotik sartu egiten da eta diafragmak argi kantitatea erregulatzen du. Horren ostean obturadore izeneko pertsiana bat dago, zabaldu eta itxi egiten dena, eta argiari pasatzen uzten diona.
Inolako zalantzarik gabe, ondo ikasi dituzte printzipio teoriko horiek guztiak, eta talentu handiz jarri dute barneratutakoa praktikan. Orotariko ariketak aurkeztu dizkie Maiedek horretarako.
Ligth painting-a da Izarori gehien gustatu zaiona. Obturadorearen abiadura txikituta, ilunpean linterna batekin egindako irudiak harrapatu ditzake kamerak. Airean idatzita agertzen diren hitzak edo forma arraroak dira horren azken emaitza.
Jonek, aldiz, collageak egitea izan du gogokoen. Eurak ateratako argazkiak baliatu dituzte horretarako. Inprimatu, moztu eta gainetik margotu dituzte. Bestelako teknikak ere baliatu dituzte argazkiak manipulatzeko: argazki baten gainean beste argazki bat ateratzea esaterako. “Gure buruari egindako irudien gainean lumak eta bestelako objektuak jarri ditugu eta munstro forma hartu dugu”.
Erakusketa
Ikasturtean landutako guztia borobiltzeko Kultur Etxeko sortzaileek iragan maiatzaren 30ean erakusketan parte hartu zuten zortzi argazkilari gazteek, Amurrioko San Anton plazan. Lanek oso harrera ona izan zutela nabarmendu dute “jendeari asko gustatu zaizkie gure argazkiak”.
Zita hori baliatu zuten ere azken hilabetean landu duten laburmetraia aurkezteko. Beldurrezko film laburra grabatu eta muntatu dute, eta, nola ez, argazkilaritza izna da gai nagusia. Kamera baten barruan harrapatuta geratzen zen neska baten istorioa kontatu dute. Beldurrezko filma laburra bazen ere, grabatzen oso ondo pasatu dutela aitortu dute: “Hanka-sartze barregarri asko filmatu ditugu”. Esteka honetan ikus daiteke pelikula osorik.
Hastapen ikastaroa izan da, baina asko ikasi eta landu dute, eta datorren ikasturtean errepikatzeko gogoz daude. Ikastaroaren gidaria izan den Maied Urrutia ere oso pozik azaldu da taldean egondako giroarekin. Irailetik aurrera, gainera, bestelako proiektuetan murgildu, eta helduentzako argazkilaritza ikastaroak eskaintzen hasiko da Urrutia Burubio Kultur Elkartean.