INMA MENDAZA

“Alferrik da euskara jakitea maitatzen ez baduzu”

Erizain bezala lan egitera etorri zen Inma Mendaza Aiaraldera. / I.M.

INMA MENDAZA (Jaen, 1995) Amurrion bizi izan da Osakidetzan lan egiten zuen bitartean. Euskaltegian ikasi zuen, eta bere egunerokoan euskara erabiltzen ahalegintzen da. 

Noiz etorri zinen Amurriora bizitzera?

Nire ama Jaengoa da, Aita Amurriokoa. Askotan joan izan naiz bertara oporretan. Duela bi urte, ordea, Osakidetzan erizain lanpostua lortu nuen eta bizitzera etortzea erabaki nuen.

Aurretik, unibertsitate garaian, ikasturte bat eman nuen Euskal Herrian ikasten ere, lanean hasi nintzenean dagoeneko ezagutzen nuen hemengo osasun sistemaren funtzionamendua.

Euskara ikastea erabaki zenuen lanera etorri zinenean, zerk bultzatuta?

Asko erakartzen nau euskarak, oso atsegina zait hizkuntza. Gainera ez zait gustatzen jendeak euskaraz egin nahi izatea eta nik ezin ulertzea, frustrantea zait.

Horretaz gain lanerako ere baliagarria zitzaidan. Osakidetzan lan egiteko nahitaezkoa ez den arren, baloratu egiten da euskararen ezagutza, eta pazienteekin nahi duten hizkuntzan egin dezaket.

Euskal Telebistan Sevillako aurkezle bat azaltzen zen euskaraz hitz egiten, eta oso ondo moldatzen zen. Horrek asko motibatu ninduen euskara ikasteko.

Amurrioko euskaltegira jo zenuen horretarako.

Bai. Mundu guztiak esaten zidan oso zaila zela, ez nuela ikasiko, baina gezurra dela demostratu dut. Iniziatibarekin erraz ikas daiteke. Asko dut hobetzeko oraindik, baina ia gehiena ondo ulertzeko gai naiz.

Asko disfrutatu dut ikasten, hori euskaltegiko irakasleei zor diet nagusiki: euskara irakasteaz gain euskararekiko eta euskal kulturarekiko maitasuna ere transmititu digutelako. Alferrikakoa da hizkuntza bat jakitea hau maitatzen ez baduzu. Aurreiritzi asko daude Euskal Herrian eta Euskal Herritik kanpo euskararekiko eta euskal kulturarekiko. Etengabe nabil aurreiritzi horiek gezurtatzen, andaluziar kulturarekiko dauden aurreiritziekin bezala.

Zertan dira antzekoak andaluziar eta euskal kulturak?

Oro har jendea oso atsegina dela uste dut, bai Euskal Herrian baita Andaluzian ere, eta lurrarekiko maitasuna oso handia da bi kulturetan. Besoak zabalik dituzten bi herri dira.

Osakidetzan lanean zinela, asko erabili duzu euskara?

Bai! Paziente askorekin egiten nuen euskaraz, eta eurek asko eskertzen zuten nire ahalegina. Hasierako esaldiak euskaraz egiten nituen beti. Asko ikasi dut horri esker. Lekeitioko paziente bat izan nuen behin, ez zekien gaztelaniaz hitz egiten, eta bere alabaren laguntzarekin batera joan nintzen berarekin euskara hutsezko harremana egiten. Berarekin ikasi nuen adibidez odola nola esaten den.

Euskara ikasten jarraituko duzu?

Ekainean Jaenera bueltatu egin nintzen Osakidetzako kontratua amaitu zitzaidalako. Hilabete barru Malagan hasiko naiz lanean baina euskara ikasten jarraitzeko asmoa daukat, argi eta garbi.Aitziberrek, euskaltegiko irakasleak, ikasten jarraitzeko materiala oparitu zidan, eta euskaltegiko lagunak prest daude nirekin batera mintzamena lantzeko.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide