Espainiako Gimnasia Erritmikoko txapelketetan parte hartu dute Amurrioko Aresketa Klubeko kideek.
Iragan ekainaren 27an Valladoliden egon ziren. Aroa Elejalde amurrioarrak ariketa egin zuen bertan, mazen kategorian.
Jon Rivera laudiorrak, bere aldetik, Valentzian egin zuen norgehiagoka, iragan igandean. 6. postua erdietsi zuen sailkapen orokorrean, eta 4. postua mazen kategorian.
“Klubarentzat ohorea da gure gimnastak Espainiako Gimnasia Erritmikoko Gizoenzkoen Txapelketan parte hartzea”, adierazi dute taldeko kideek. Zehaztu dutenez, 74 kirolarik hartu zuten parte lehiaketan, Eneko Lambea tartean (Leioako Sakoneta taldeko kidea eta 5 aldiz txapelduna izan dena).
Hurrengo ikasturteari begira
Elejalde eta Riverak klubean entrenatzen jarraituko dute, hurrengo denboraldiari prestatzeari begira. Entrenamenduek “COVID-19aren aurkako murrizketengatik baldintzatuta” jarraitzen dute, klubeko kideek azaldu dutenez, baina kirolariek “pasio eta dedikazio berdinarekin” jarduten jarraitzen dute.
Matrikulazio epea irekita
Bukatzeko, klubeko kideek gogorarazi dute matrikulazio epea irekita jarraitzen duela “gimnasia erritmikoa ezagutu nahi duen 5 urtetik gorako edonorentzat”.