Bi proiektu aurkeztu ditu Amurrioko Udalak Arabako Foru Aldundiaren Obra eta Zerbitzuen Foru Planaren 2022-2023 Programara: Landako auzoaren urbanizazioa eta kiroldegiaren eraberritzea.
Lehen proiektuaren bidez, Landakon berdegune gehiago jartzea eta zonaldea irisgarriagoa bilakatzea nahi dute, oinezkoak “protagonista” bilakatuz. Hala azaldu du Txerra Molinuevok. “Behin betiko proiektua auzotarrek diseinatuko dute auzoko batzarretan”, zehaztu du alkateak. Dena den, proiektuak honako jarduera hauek barnebiltzea aurreikusi dute: ingurua berriz urbanizatzea, hornidura-azpiegiturak atontzea, hondakin-uren saneamendua, euri-uren saneamendua, elektrizitate, argiteria publiko eta telefonia azpiegiturak lurperatzea eta kaleak zolatzea. 1.206.810 euroko aurrekontua izango luke egitasmoak.
Bigarren proiektuak, aldiz, Bañueta kiroldegiaren barrualdea eraberritzea eta espazioa banaketa berria egitea ahalbidetuko luke. “Proiektu horrek espazio berriak sortu nahi ditu kirol-instalazioan, herritarrek hautemandako beharrei erantzuteko, ikasgelak edo itxaroteko edo atseden hartzeko topalekuak, besteak beste”. Kiroldegian dauden klub eta elkarteen lokalak ere hobetuko lirateke, guztira 1.604.278 euro baliatuta.
EH Bilduren kritika
EH Bilduk, bere aldetik, oharra plazaratu du proiektuen gaineko iritzia emateko. Oposizioko taldearen ustez, udalerriko kultur azpiegiturak hobetzeko dirua ere eskatu beharko litzateke.
EH Bilduk begi onez ikusi du kiroldegiko lanak egitea, baina Kultura Etxea eta Udal Liburutegia ere eraberritu beharko liratekeela uste du.
"Aurrekontu oso altuak dituzten proiektuez ari gara, gure udalerrirako oso beharrezkoak diren azpiegiturak finantzatzeko balio dutenak, baina erabakia hartuta zegoenean jakin dugu”, azaldu du Jon Berganza Urruela zinegotziak, “hilabete baino gehiago da Udal Gobernuari prest gaudela Lan eta Zerbitzuen Foru Planarekin finantzatu beharreko proiektuen aukeraketan ekarpenak egiteko, baina, beste behin ere, gobernu taldeak bizkarra eman dio oposizioari”.