Prentsa oharra plazaratu du Amurrioko PSE-EEk iragartzeko gaur arratsaldeko plenoan Hiri Antolamendurako Plan Orokorraren (HAPO) behin behineko onarpenaren alde egingo duela. Dokumentu “estrategikoa” dela uste du David Romerok, “balio sozial eta politiko handikoa”. Planaren zirriborroa lan askoren emaitza dela nabarmendu du zinegotzi sozialistak. “Bizitzeko erakargarriagoa izango den udalerri bat diseinatzen ari gara, enplegu aukerekin, pertsonentzako diseinatutako hirigintzarekin eta etxebizitzara sarbidea errazteko ekintzekin”.
Romerok nabarmendu du planaren zirriborroak aukera ematen duela Amurriok hirigintza aldetik bizi duen errealitatea ezagutzeko, eta gabeziak detektatzeko balio duela horrek.
Horrez gain, dokumentuak aintzat hartzen ditu Eusko Jaurlaritzatik garatzen ari diren etxebizitza politikak, PSE-EEk kontrolatzen duen sailetik garatzen ari direnak. Romerok azaldu duenez, zoru publikoan etxebizitza eraikitzea sustatzen ari da gobernua, alokairu erregimenean merkaturatzeko eta, modu horretan, “espekulazioa eta etxebizitzaren garestitzea” ekiditeko. Horrez gain, hutsik dauden etxebizitzak merkaturatzeko neurriak ere hartu ditu erakunde publikoak, zinegotziak nabarmendu duenez. “Ekintza eta politika zehatzak dira, jada abian daudenak, Eusko Jaurlaritzak Amurrion iragarritako 111 etxebizitzen eraikitzearekin”.
Bukatzeko, Romerok aipatu du proposamenaren aldeko botoa emanda, PSE-EEk konpromisoa hartzen duela presente dagoen erakunde guztietan (Aldundia eta Eusko Jaurlaritza) lan egiteko, dokumentuaren tramitazioa errazteari begira. Horrez gain, iragarri du bi ekarpen sartuko dituztela planean: aldaketa klimatikoaren aurkako neurriak ezartzea eta pertsonentzako pentsatutako hiri-inguruneak diseinatzeko. “Gure udalerria erakargarria izaten jarraitu behar du bizi eta lan egiteko”.