'InfoAmurrio' izeneko 'app'-a sortu du Amurrioko Udalak, eta 'Urban Services' sistema ezarri du Obra eta Zerbitzuen Arloan. Modu horretan, udalerrian jasotzen diren gorabeherak modu eraginkorragoan kudeatu eta herritarrekiko komunikazioa hobetu nahi du tokiko erakundeak.
Udalak azaldu duenez, herritarrek geroz eta ekarpen gehiago egiten dituzte udalak konpondu beharreko gorabeheren inguruan. Orain arte hainbat tresna baliatu dituzte hori bideratzeko (telefonoa, posta elektronikoa, Herritarrentzako Arreta Zerbitzua, WhatsApp bezalako kanal berriak, herrilaguntzaileak edota auzo batzarrak).
Orain, baina, “prozesua arindu” nahi dute. “Inplementazio honekin udalerrian gertatzen diren gorabeheren kudeaketa eraginkorra eta automatizatua izatea eta denbora errealean egitea bilatzen dugu”, azaldu du Txerra Molinuevo alkateak.
Aplikazioa doan deskargatu daiteke Apple Storetik edo Google Playtik. Hainbat aukera ematen ditu tresna berriak: informazioa eskaintzen du, gorabeheren berri emateko aukera ematen du eta udal tramiteak egiteko ere balio du, besteak beste.
Gorabeheren atala, izango da, hain zuzen, udalarekin interakziorik handiena ahalbidetuko duena. “Herritarrak zer gorabehera mota den adierazi ahal izango du: argiteria, garbiketa, altzariak, besteak beste”, azaldu dute, “jakinarazpena bidaltzean, gertakariaren kokalekua, argazkia eta iruzkina erantsi ahal izango dira, eta baita harremanetarako datuak ere. Gorabehera erregistratu ondoren, erabiltzaileek haren jarraipena egin ahal izango dute”.
'Urban Services' plataformak, aldiz, udal brigadaren eta azpikontratatutako enpresen arteko koordinazioa bermatzeko balioko du. “Sistema hori ezartzeak taldeen lanak planifikatu, antolatu eta sistematizatzeko aukera ematen du; horien artean, herritarrek antzemandako gorabeherak, eraginkortasun handiagoa lortuz”.
Horrez gain, kostuak optimizatu eta mantentze-ekipoak hobeto kudeatzeko balioko du plataformak, udalak zehaztu duenez.