Errepresio sindikala salatu du CNTk Tubos Reunidosen, eta epaitegietara jo du

Tubos Reunidos, artxibo irudi batean. / Aiaraldea.eus

Informazioa ukatzea eta iragarki ohola erabiltzen ez uztea leporatu diote zuzendaritzari. 

Zuzendaritzaren partetik  “bazterketa” pairatzen duela salatu du Tubos Reunidoseko CNTren sail sindikalak. Sindikatuko kideek adierazi dutenez, enpresako buruek oinarrizko eskubideak ukatu dizkie, "eskubide horiek hitzarmenean edota Askatasun Sindikaleko Lege Organikoan  jasota dauden arren". 

Informazioa ukatzea eta iragarki oholean informazioa jartzen ez uztea leporatu diote zuzendaritzari. Giza Baliabideen Bulegora jo dute, baina ez dute egoera bideratzea lortu. Gauzak hala, informazioa “bide judizialetatik” eskatu dute, eta erabilerarik ez duen beste taula bat erabiltzen hasi ziren duela zenbait egun, baina hori baliatzea ere eragotzi die enpresak. 

Gertatutakoa “pertsona orori” eragiten diola uste dute sindikatuko kideek. “Zuzendaritzak Enpresa Batzordea aitortu nahi du soilik langileek ordezkari gisa, eta enpresak ezarri nahi digun mugapen bat da hori”. Ildo horretan, sail sindikalak “sindikalismoaren oinarria” direla aldarrikatu dute. “Gure sailak horizontalki funtzionatzen du, ekintza zuzena praktikatzen. Horrek esan nahi du asanbladak erabakitzen duela eta aurrea eramaten dugula”. Jarduteko modu horrek zuzendaritzaren funtzionamenduarekin talka egiten duela uste dute. “Demokrazia fabrikaren atean amaitzea gustatuko litzaieke. Baina ez da hala, badago sindikalgintza egiteko beste era bat, oinarrietatik, zuzenean inplikatuak daudenek erabakita”. 

Lantegiko egoera ere salatu dute CNTko kideek: “Lana Erregulatzeko Aldi Baterako Espediente jarraitua, soldata izoztua, hitzarmena iraungita, hitzarmena errespetatzen ez duten dinamikak... ezin dugu egoera hau onartu, edo baliteke gero damutzea”.  

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide