“EAJren Amurrioko Udal Gobernuak ez du bete ekitaldi honetarako sinatutako aurrekontu akordioa”. Hala salatu du EH Bilduk prensa ohar baten bidez. Opozisioko taldeak zehaztu duenez, akordio horren arabera, uztailean adostuko zen “urteko lehen hilbateetan kontsumitu gabeko kredituaren erabilera”. Mariano Alava zinegotziak adierazi du “iruzurtuta” sentitzen direla, udalak uko egin diolako hartutako konpromisoak betetzeari, “hala nola Udal Erregelamendu Organiko bat edo udaltzaingoaren funtzionamendurako araudi bat sortzea”.
Hori esanda, eskaera bat luzatu dio koalizioak udal gobernuari: aurrekontuan gastatu gabe geratu diren 236.000 euroak Zabaleko Eskolako azpiegiturak hobetzera bideratzea: frontoia bainugelez eta aldagelez hornitzeko, hezetasun-arazoei irtenbidea emateko, patioko zoladura konpontzeko, sistema elektrikoa berrikusteko edo 30 urte baino gehiago dituen galdara ordezkatzeko. "Ez da nahikoa pankarta baten atzean jarri eta erantzukizunak saihestea. Argi geratu da, nahiz eta baliabideak izan, Amurrioko EAJren lehentasunen artean ez dagoela Zabalekoren biziraupena bermatzea", salatu du EH Bilduk.