Aste gutxi barru abiaraziko du Amurrioko Udalak Euskarabide proiektua, erronka argi batekin: herriko gazteen artean euskara bultzatzea. Horretarako, gazteek multiabentura irteerak eta bestelako tailerrak izango dituzte eskura.
Multiabentura ekintzek abiatuko dute Euskarabide programa irailaren 4an, eta urriaren 9ra arte iraungo dute. 6 irteera antolatu dira guztira: Via Ferrata (Sobronen), Paddle surf (Karraspio hondartzan), Kayak (Urdaibaiko jaitsieran), Coastering (Lekeition), Eskalada (Saturrarango hondartzan) eta Arroila jaitsiera (Saturioko jaitsieran).
Ekintza guztiak larunbatetan izango dira, eta 14 urtetik gorako gazteek parte hartu ahal izango dute. Izena emateko euskara@amurrio.eus helbidera idatzi behar da. Kontuan hartzekoa da izena emateko epea ekintzaren asteko astelehenean bukatuko dela.
Bestalde, irailetik azaroaren erdialdera, Euskara Eskola Ibiltaria izeneko ekimena burutuko da, teknologia berrien laguntzaz gazteei euskararen ezagutzan eta erabileran laguntzeko. Horren helburu nagusia “euskara ikasgeletatik kanpo ateratzea da, bizitza publiko eta pribatuetan indartsuago egoteko”. Horretarako, ordubeteko saioak planteatuko dira astero, zeintzuetan TikTok tailerra, podcastak, filma laburrak... burutuko diren.
