Udako atsedenaldiaren ondoren, Arkeologiarako Arabar Institutua "Arkeologia berriak Araban" bisita gidatuen programaren irteerekin itzuliko da jarduerara. 2017an 60 urte bete zituen erakundeak, eta gaur egun ere jarraitzen dute jarduera arkeologikoak antolatzen.
Horregatik, irailaren 12an irteera bat egingo da San Pedroko Gotorlekura, Amurrion. “Bertan lubakiz, aireko babeslekuz eta oso ondo kontserbatutako hormigoizko bunkerrez osatutako paisaia bat dago, Euskal Herriko Gerra Zibileko borroketara garamatzana”, azaldu dute institutuko kideek.
Gainera, proiektu arkeologikoaren helburuetako bat San Pedro-Askuren oroimenerako gune bihurtzea da, ezagutza zientifikoaren eta giza eskubideen sustapenaren ikuspegitik pedagogia publikoa lantzeko. Irteera Josu Santamarina Otaolak gidatuko du, Euskal Herriko Gerra Zibileko Paisaiaren Arkeologiari buruzko doktorego-tesia amaitzen ari den EHUko ikertzaileak.
Irteera irailaren 12an gauzatuko da, igandea, Uzkiano herritik abiatuta, 10:00etan. Ibilbide erraza izango da, 4 kilometrokoa. Hala ere, gomendagarria da mendiko arropa egokia eramatea. Izena emateko http://www.iaa-aai.org/ webgunean dagoen orria bete behar da, eta secretaria@iaa-aai.org helbide elektronikora bidali irailaren 10a baino lehen (ostirala). Arkeologia Institutuko bazkideentzat eta 16 urte baino gutxiagokoentzat dohainik izango da irteera. Gainontzekoek 5 euro ordaindu beharko dituzte. Gehienez 30 pertsonek parte hartu ahal izango dute.
