Mikrotxipen gabeziak sekulako porrota sortu du munduko ekonomiaren susperraldian pandemiaren une latzenen ostean eta Aiaraldean agerikoa da hori. Izan ere, Mubea -Inauxa- eta Megatech enpresek Enplegua Aldi Baterako Erregulatzeko Espedienteak abiatu dituzte euren ekoizpena eskaera murrizketetara moldatzeko.
Izan ere, bi konpainiak daude auto eta ibilgailuen produkziora lotuta eta euren bezeroek eskaerak txikitu dituzte, mikrotxipen faltak ez baitie aurreikusitakoari eusteko aukerarik eman.
Mubearen kasuan, irailaren erdialdean adostu zuten langile batzordeak eta zuzendaritzak ostiralero ekoizpena etetea eta beharginek langabezia baliatzea. "Azkenean, bi ostiraletan baino ez gara etxera joan, baina enpresak otsailera arte luzatuko du espedientea", adierazi dio langile batzordeko ordezkari batek Aiaraldea Komunikabideari.
Megatechen lanaldiak murrizteko akordioak ez du LAB sindikatuaren sinadura jaso. Horrela azaldu du sindikatu horretako kide batek: "COVIDak eragindako espedienteen ostean, hirugarren espediente batean gaude, eta enpresak ez du konpromisorik hartu behin hori bukatuta lanpostuak bermatzeko".
Printzipioz, azken espediente horrek 2022ko ekainaren 30era arte iraungo du eta, gehienez, 90 egunekoa izango da.
Ez Mubeak ez Megatechek ez dituzte mikrotxipak erabiltzen euren lantegietan, baina autoen industriak ez duenez osagai elektroniko horien horniketa bermatua, euren eskaerak murriztu dituzte eta ibilgailuen ekoizpenera lotuta dauden sektoretan eragin kaltegarria ekarri du horrek
Mikrotxipen arazoa
Berez, ez Mubeak ez Megatechek ez dituzte mikrotxipak erabiltzen euren lantegietan, baina autoen industriak ez duenez osagai elektroniko horien horniketa bermatua, euren eskaerak murriztu dituzte eta ibilgailuen ekoizpenera lotuta dauden sektoretan eragin kaltegarria ekarri du horrek.
Mikrotxipen edo erdieroaleen krisialdia ekaitza perfektu baten ondorioa da, eta mundu osoan izan du eragina, Aiaraldeko kasuak erakutsi duen moduan.
Hain zuzen, neurri batean, pandemiak eta itxialdiak dute atakaren ardura, baina egoeraren erroak sakonagoak dira. Alde batetik, itxialdian teknologia berrien -ordenagailuak, bideokontsolak...- kontsumoa biderkatu zen eta ez da apaldu geroztik. Antza, 2021eko lehen hiru hilabeteetan %55 igo zen kontsumoa.
Eskaeren gorakadak mikrotxipen ekoizleen gaitasuna gainditu zuen eta enpresek aukeratu zuten produktu garestienei eta etekin gehien sortzen zituztenei lehentasuna ematea. Ondorioa izan zen azken belaunaldiko ordenagailuen eta txartel grafikoen txipak igo zirela zerrendaren lehenengo postuetara eta autoenak edota etxeko tresnenak -zaharragoak eta sinpleagoak- ilararen azken tokietan geratu zirela.
Horri, gainera, bestelako aldagaiak gehitu behar zaizkio: 5G sarearen garapenak teknologia hau behar duela, ekoizleak oso gutxi direla (Taiwan eta Hego Koreakoak gehienbat) eta espekulatzaileak ere agertu direla.
Lehen arazoak kutsu geopolitikoa bazuen, askoz gehiago du orain
Lehen arazoak kutsu geopolitikoa bazuen, askoz gehiago du orain. Estatu Batuek Txinaren kontrako zigorrak abiatu zituzten, jatorri amerikarra zuten teknologiak erabiltzeagatik bere mesederako eta horrek, ondorioz, mikrotxipak garatzeko gaitasuna oztopatu zion erraldoi asiarrari. Europar Batasuna zein Amerika konturatu dira zein zaurgarriak diren teknologikoki eta inbertsioak egiteko plana garatzen ari dira, euren ekoizpen propioa bermatzeko eta hornidura katearen menpe ez egoteko.
Edonola ere, mikrotxipak ekoizteko lantegiek urteak behar dituzte eraikitzeko eta funtzionatzen hasteko. Hortaz, ikusteke dago zer nolako eragina izango duen munduaren norabidean eta, nola ez, Aiaraldeko enpresetan.
Enpresa guztiek ez dute kaltea sumatu
Zorionez, autoen industriara loturik dauden enpresa guztiek ez dute krisi hau nabaritu. Esaterako, Glavista Laudiok -lehen Guardian Glass zenak- txanda guztiak ditu lanean eta ELAko kide batek honakoa ziurtatu dio Aiaraldea Komunikabideari: "lehen bezain beste edo gehiago ekoizten dugu orain".