Iñaki Bea amurrioarrak nazioarteko erronka izango du azaroaren 13tik 20ra bitartean. Izan ere, AFEk -Futbolari Espainiarren Elkarteak- proposatu dio bere taldea entrenatzea Korantina Homes Cup 2021 txapelketan.
Txipren lehiatuko den norgehiagoka horren helburua da klubik gabe dauden jokalariek euren gaitasunak erakustea. Profesional gehienak ez dira bereziki ezagunak, 2. B mailan aritu direlako, baina badaude 1. mailan egon direnak, Raul Albentosa, kasu. Albentosak Eibarren, Derby Countyn, Deportivo de la Coruñan, CSKA Moskun edota Dinamo Bukaresten militatu du.
Elkarteak izena emateko epea ireki zuen urrian eta azaroaren 2an jo zuten amaitutzat.
Zentzu horretan, Beak badaki ardura zaila izango duela: "Agente eta idazkari tekniko ugari egongo dira eta jokalariek nahi izango dute onena eman. Zentzu horretan, malgutasuna eta talde bat gidatzeko gai naizela probatu beharko dut".
Txipren jokatuko den txapelketa erakusleihoa da, klubik gabeko jokalariek kontratua eskuratu dezaten.
Berez, AFE futbolarien sindikatua da eta txapelketa erakusleiho moduan pentsatuta dago, kontraturik gabe dauden profesionalek taldea lor dezaten. Horretarako, azaroaren 8tik 13ra bitartean kontzentrazioa eta entrenamenduak egingo dituzte Los Angeles de San Rafaelen (Segovia), maila onenarekin heltzeko.
Iñaki Beak zuzenduko duen taldeak Aris Limassol, Riga F.C., Pafos F.C., Brentford F.C. eta F.C. Rodina Mosku izango ditu aurrean eta, emaitza onak eskuratuz gero, partida bakarreko kanporaketa fasera igaroko da.
Hurrengo geltokia, Austria
Beak ilusio handiz hartu du eginkizuna, bera ere langabezian baitago eta uste du bere bertuteak erakusteko balioko diola. Edonola ere, amurrioarra Austrian lan egiteko urratsak abiatu ditu eta berriki han egon da agente batekin. Eskaintza profesionalen bat izatea espero du orain.