Udal aurrekontuen eztabaidan buru-belarri sartuta daude Amurrioko talde politiko instituzionalak. Orain Amurriok prensa oharra plazaratu du bere posizionamendua azaltzeko. Oposizioko talde politikoak udal gobernuarekin izandako bileran jakinarazi zuen ez zuela aurrekontuen alde bozkatuko, “ezberdintasun programatiko nabarmenak” dituelako. Baina zabalik utzi zuen akordioetarako atea, gobernuak bi baldintza betez gero: “aurreko urteetako aurrekontu-kopuru konprometituak gauzatzea eta udal-politiketan eragin handia duten proposamenak onartzeko benetako borondatea erakustea”.
Gauzak hala, hainbat ekarpen egin dituzte Orain Amurrioko kideek aurrekontuei begira.
Etxebizitza
Etxebizitzaren alorrean bi gauza proposatu dituzte. Alde batetik, Hiri Antolamenduko Plan Orokorra garatzen hasteko “betearazpen publikoko organo” bat eratzea eskatu dute, “babes publikoko etxebizitzak alokairu sozialeko erregimenean lortu ahal izateko”.
Bestetik, partida bat sortzea planteatu dute, 18 eta 35 urte bitarteko gazteei etxebizitzak alokatzen laguntzeko.
Kiroldegiaren kudeaketa publikoa
Bere aldarrikapen historiko bati ere eutsi diote Orain Amurrioko kideek: kiroldegiaren kudeaketa publifikatzea. Zehazki, aukera hori aztertzeko txosten juridiko eta finantzarioa eskatzea eskatu dute.
Klima-aldaketa
Ingurumenaren egoeran ere jarri du arreta oposizioko taldeak. Bioaniztasuna Ikertzeko eta Zabaltzeko Zentro bat sortu daitekeen aztertzea proposatu du. Horrez gain, administrazio batzarretan birziklapenerako “mini-puntu berdeak” jartzea proposatu du, eta baita bizikletentzako aparkaleku estaliak jartzea ere.
Enplegua
Enpleguari dagokionez, dauden laguntzak handitu nahi ditu talde politikoak, eta beste hainbat proposamen ere jarri ditu mahai gainean:
- Bi gurpil aulki erostea, mugikortasun urriko pertsonei maileguan uzteko.
- Bide publikoetatik hildako animaliak biltzeko protokoloa osatzea eta egoera horietan jarduteko baliabideak eskuratzea.
- Udal-baratzeetako azpiegiturak hobetzea eta Nerbioiko Parke Linealeko zenbait tokitan markesinak jartzea.
Udal gobernuak proposamen hauek onartuz gero, batzorde bateratu bat eratzea proposatu du Orain Amurriok, partidak gauzatzen direla bermatzeko. “Urte hauetan guztietan bezala, proposamenak aurkeztu ditugu Amurrioko azpiegiturak eta zerbitzuak hobetzeko, iraunkortasun-printzipioetatik, udal-zerbitzu publikoen kalitatea hobetzetik eta kudeaketa publiko eraginkorrago batetik. Azken batean, diru publikoa Amurrioko herritarren ongizatea hobetzeko erabiltzea proposatzen dugu”.