Abuztuan argitaratu zenuen liburua, zure lehenengo lana.
Bai, mundura irekitzeko modu bat izan da niretzat. Bizi izan ditudan esperientziak kontatu ditut.
Musika da liburuaren ardatz nagusia.
Hori da. Niri betidanik gustatu izan zait musika. Nire burua isolatzeko edota barrenak askatzeko erabiltzen dut. Kirolak ere asko lagundu dit horretan. Kirola eta musika uztartuta, erraza suertatu zait honaino egin dudan bidea.
Musikak zure bizitzan izan duen eraginari buruz hitz egiten duzu, orduan.
Txikitatik hona gertatu zaidan guztia kontatu dut, pausoz pauso.
Abeslaria ere zara. Nola hasi zen musikarekin duzun harremana?
Txikitatik gustatu zait musika. Baina urrats garrantzitsu bat eman nuen abesten eta sare sozialetara bideoak igotzen hasi nintzenean. Jendearen babesa sentitu nuen orduan.
Duela bi urte ekin nion hori egiteari. Instagramen hasi nintzen, eta Youtubeko kanala eta Tik Tok kontua ireki nituen gero.
Proba moduan egin nuen. Gustuko nuen abestea eta ikusi nahi nuen ea jendeak gogoko zuen egiten nuen hori.
“Urrats garrantzitsua eman nuen abesten eta sare sozialetara bideoak igotzen hasi nintzenean. Jendearen babesa sentitu nuen orduan”
Nolakoa izan da zure bilakaera abeslari moduan?
Oso ona. Bideoak plazatzeak aukera eman dit pertsona oso onak ezagutzeko, orain nire sostengu direnak. Amurrioko zein kanpoko jendeak jarraitzen du nire lana. Badago Murtziako familia bat nire abestia entzuten dituena eta liburua irakurtzen dagoena. Asko pozten nau horrek. Badago baita asko maite dudan jendea, musikari esker ezagutu dudana.
Bertsioak egiten ditut batez ere, baina batzuetan saiatzen naiz nire abesti propioak plazaratzen.
Sare sozialetatik oholtza batera salto egitea pentsatu duzu noizbait?
Egona naiz oholtza baten gainean, Amurrioko Musika Eskolari esker. Gustatuko litzaidake zerbait gehiago egin ahal izatea.
Hori guztia islatu duzu liburuan?
Bai, baina liburuaren helburu nagusia gure haurtzaroko “ni”-arekin konektatzea da, modu horretan topatu dezakegulako inspirazio gehien, aurrera jarraitu ahal izateko.
Liburuak balio izan dit jakiteko jendeak ere musika gogoko duela eta nirekin konektatzen jakin izan duela.
Harrera ona izan du, beraz.
Bai, nahiko positiboa. Jende askok esan dit hainbat aldiz jarraian irakurri duela, liburuak dituen zenbait sekretu deskubritzeko.
Zertan lagundu dezake musikak gaztaroan?
Nik uste dut musikak balio duela ihesbide moduan. Abestiek bat egiten dute dituzun sentimenduekin. Horrek asko laguntzen zaitu sentimenduak kanporatzerako orduan.
Eskerrak eman nahi dizkiot bereziki Eiderri, nire bikoteari. Bera da liburua argitaratzeko pausoa ematera bultzatu nauena eta lagundu didana nire bizitzako beste hainbat proiektu aurrera ateratzen. Berari dedikatu diot liburua.