Trantsizio energetikoa helburu, hainbat proposamen aurkeztu ditu Amurrioko EH Bilduk Europako funtsen deialdira aurkezteko

Udal azpiegitura guztietan eguzki plakak jartzea proposatu du EH Bilduk. / Aiaraldea.eus

Proposamen sorta aurkeztu du Amurrioko EH Bilduk Europako funtsen barruan abian jarri diren deialdietara aurkezteko. Sei dira trantsizio energetikoa bultzatzeko mahai gainean jarritako proiektuak.

Sei proposamen aurkeztu ditu Amurrioko EH Bildu udal taldeak Europako funtsen barruan abian jarri diren deialdietara aurkezteko aukera baloratzeko. Proiektu gehienek trantsizio energetikoa bultzatzea dute helburu. Hiru alor nagusitan banatu dituzte proposamenak: energia berriztagarriak, birgaitzea eta mugikortasun elektrikoa.

Hauek dira udal-taldearen proposamenak:

  • Amurrioko udal-eraikinetan galdaren ordez biomasa-galdarak jartzea.
  • Udal-ekipamenduen leihoak eta ateak modernizatzea energia alferrik ez galtzeko.
  • Udal-estalki guztietan plaka fotovoltaikoak jartzea.
  • Izartzako basozainaren etxe zaharra birgaitzea ingurumen-zentro bat egiteko.
  • Aresketamendi energia berriztagarrien parke gisa birgaitzea.
  • Ibilgailu elektrikoak kargatzeko gune publikoak jartzea.

"Gure baliabideak mugatuak dira, eta horregatik uste dugu Amurriok ezin duela galdu horrelako proiektuak finantzatzeko Europako funtsekin irekitzen den aukera”, azaldu du Iñaki Ibarluzea Amurrioko EH Bilduko bozeramaileak proiektuak aurkezterako unean.

Diru-laguntza jaso dezaketen egitasmoen inguruko informazioa partekatzeko batzarrak deitzea eta Administrazio Batzarren zein herriko eragileen ekarpenak jasotzeko espazioak sortzea ere proposatu du talde politikoak. "Proiektu horien edo beste batzuen definizioa ez da gobernu-taldearen esku geratu behar, gobernu-taldeak betoa jarri baitio gai horri buruzko informazioari", azaldu du Ibarluzeak.

COVID-19ak eragindako krisiari erantzuteko sortu ditu Europar Batasunak Europako funtsak, eta Batasuneko herrialdeen artean banatuko da dirua. Espainiar Estatura 140.000 milioi euro iritsiko dira. Euskal Autonomia Erkidegoan Jaurlaritzak osatutako 'Euskadi Next' programaren barruan banatuko dira partidak, enpresen eta tokiko erakundeen artean.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide