ARGAZKIAK

Galder Barbado gazteak Auzitegi Gorenaren ebazpena edozein egunetan jaso dezakeela ohartarazi dute Amurrion

'Alarma gaua' deitu du gaur gauean ANkerkeriari STOP plataformak  Galder Barbado eta Aitor Zelaia gazteen aurkako Auzitegi Gorenaren ebazpena berehalakoa izan daitekeela ohartarazteko. Egoera honen aurrean elkartasuna antolatzeko deia egin dute.

Alarmak piztu dituzte gaur gauean Amurrion, Galder Barbado eta Aitor Zelaia gazte arabarrek Auzitegi Gorenaren ebazpena egun batetik bestera jaso dezaketela ohartarazteko.

Horretarako, sirenak eta argi gorriak piztu dituzte ANkerkeriari STOP plataformako kideek herriko hainbat txokotan, eta dozenaka lagun aritu dira eskuorriak eta pegatinak banatzen, bi gazteen kasua aditzera emateko asmoz.

Plataformak, berehalako ebazpenaren zain egon gabe, antolatzeko deia zabaldu du, bai herri ekimenez prozesuak eragindako gastuei aurre egiteko dinamiketan ekarpena eginez, baita datozen asteetan egingo diren mobilizazio eta egitasmoetan parte hartuz.

Galder eta Aitorren kasua

2019ko otsailean atxilotu zituen Ertzaintzak Barbado eta Zelaia, Auzitegi Nazionalaren aginduz. Sei hilabete egon ziren preso Darocako (Zaragoza) espetxean, 2019ko abuztuan baldintzapean eta epaiketaren zain aske geratu ziren arte. ANkerkeriari STOP herri plataformak bideoa plazaratu du kasuaren nondik norakoak laburbilduz:

Iazko urtarrilean epaitu zituzten bi gazte arabarrak. Jose Perals fiskalak (Altsasuko gazteen kasuko berdinak) 8 urteko espetxe zigorra eta 7 urteko baldintzapeko askatasuna eskatu zuen bi gazteentzat. Angela Murillo izan zen epailea, Bateragune auzia zuzendu zuena.

Murillok lau urteko espetxe zigorra, urte bateko zaintzapeko askatasuna eta 10 urteko inhabilitazioa ezarri zien Barbado eta Zelaiari,  "lehergarriak egiteko elementuak gordetzea" egotzita, Dura herrian topatutako bidoi bat dela eta.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide