Amurrioko Mendiko Lagunak elkarteak topaketa giroan agurtuko du negua. Izan ere, ibilaldi berezia prestatu dute martxoaren 12rako. Hain zuzen, Adarra tontorrera igoko dira lehenbizi, eta sagardotegian berreskuratuko dituzte indarrak gero. Nabarmendu dutenez, ibilbide erraza izango da, "6.5 kilometrokoa guztira".
Mendiko Lagunaken esanetan, gainera, dutxa hartzeko aukera eskainiko dute. Astigarragako kiroldegian egingo dute geldiunea horretarako, nahiz eta gorputza garbitzeko 5€ ordaindu beharko dituzten interesdunek. Jarraian, sagardotegira joango dira, kiroldegitik 100 metrora kokatua baitago. Izen-ematea -eta ordainketa- Mendiko Lagunaken webgunean egin beharko da, martxoaren 8a baino lehen.
Prezio bereziak gazteentzat
Bazkideek 60€ ordaindu beharko dituzte egunpasa osoagatik, eta gainontzekoek 70€. Dena den, 29 urte arteko bazkideek deskontua izango dute: 29 urte artekoek 45 euroren truke egin ahalko dute txangoa, eta 25 urte artekoentzat are merkeagoa izango da (30€).
Irteera ordua 7:15 izango da Laudiotik (Eroskiko biribilgunean, Gurutze Gorriko geltokian egingo du pausaldia autobusak), eta 07:30ean abiatuko dira Amurrioko Telefonika eraikinetik. Itzulera, aldiz, 23:30ean izango da Hernanitik.