Amurrioko Gaztetxean atondutako ikasgelak ateak zabaldu ditu berriro ere azterketa garaian murgilduta dauden ikasleei ikasteko espazio bat eskaintzeko helburuarekin. Amurrioko ikasgelek herriko ikasleen beharrak asetzeko espazio gutxi eta ordutegi murritzak dituztela adierazi dute Gazte Asanbladako kideek. Hori dela eta, espazio autogestionatua jarri dute Amurrioko gazteen eskura.
2020an atondu zuten espazioa, ikasleek beharrezko dituzten baliabideekin, Interneterako konexioa edota apunteak inprimatzeko aukera tartean. Espazioak ordutegi malgua eskaintzen du, eta hau erabiltzeko Interneten eskuragarri jarri duten inprimakia bete behar da soilik.
Ikasgela zabalik!
— A.G.A. (@AmurriokoGA) February 15, 2022
Azterketa garaia bertan da eta gazteok udalaren ikasgelak goraino eta ordutegi eskasak topatzen ditugu berriz ere.
Autogestionatu dezagun ikasgela.
Ikasgela erabiltzeko linka ( https://t.co/Ul8229OtUY).
Amurrioko Gaztetxean itxarongo zaitugu!!
Proiektuak labean
Ikasgelaz gain, bestelako proiektuetan murgilduta dago Amurrioko Gazte Asanblada, eta kontzertuak eta ekintza berriak iragarri dituzte datozen hilabetetarako. Asteburu honetan lan eguna antolatu dute Gaztetxean, proiektu berriei bidea egiteko. Otsailaren 20an, 16:00etan, jarri dute hitzordua. Herriko gazteei zabaldu diete bertaratzeko gonbita. Baldintza bakarra jarri dute: "lan egiteko arropa erosoa eta lanerako gogoa eramatea".