Martxoaren 3an abiatuko du Amurrioko Udalak aurrekontu parte-hartzaileen kanpainaren azken zatia. Inbertsio proposamen finalistak bozkatzeko aukera izango dute herritarrek, martxoaren 3tik 18ra luzatuko den bozketa fasean.
Udalak urrian abiatu zuen AmurrioEKIN kanpaina, hirugarren urtez aurrekontu parte-hartzaileak definitzeko helburuarekin. Guztira, 430.000 eurokoa izango da tokiko erakundeak egingo duen inbertsioa.
Bi multzotan sailkatu dituzte inbertsio proposamenak: 48.000 euro baino gutxiagoko aurrekontua dutenak eta 48.000 euro baino gehiagokoak. Lehenengoak 2022an exekutatu nahi ditu udalak, horretarako 215.000 euro bideratuta. Kostu handiagoko inbertsioak, aldiz, 2023an exekutatuko dituzte, beste 215.000 euro bideratuz.
Bozketa fasea
Gaur aurkeztu dituzte bozketa fasearen nondik norakoak Txerra Molinuevo alkateak eta Ana Izquierdo parte-hartze teknikariak. Bozketa martxoaren 3an, ostegunean, abiatuko dute, eta martxoaren 18ra arte egongo da proposamenak aukeratzeko tartea. 16 urtetik gorako Amurrion erroldatutako bizilagun orok izango du parte hartzeko aukera.
Ana Izquierdok, @AmurrioUdala|ko parte-hartze teknikariak, aurrekontu parte-hartzaileen bozketa fasearen nondik norakoak azaldu dizkigu gaur goizean egindako aurkezpenean. Guztira 32 dira azken fasera igaro diren inbertsio proposamenak https://t.co/zNKjVSkuqD pic.twitter.com/yHZIiEclfy
— Aiaraldea.eus (@aiaraldea) February 28, 2022
Udalak bozketa txartelak banatuko ditu etxez etxe, eta udaletxean, Bañueta kiroldegian eta Kultur etxean jarriko diren postontzietan utzi ahalko dira. Internet bidez bozkatzeko bidea ere zabalduko dute, AmurrioEKIN.eus helbidean.
Martxoaren 4an, 11n eta 18an erakustokia jarriko dute San Anton plazan. Bertan bozkatzeko aukera izango dute herritarrek, bai eta prozesuarekiko edozein zalantza argitzeko ere. Gainera, ostegunean -martxoak 3- bozketa fasearen aurkezpen orokorra egingo dute udaletxeko areto nagusian, 18:30ean.
Sei hilabeteko prozesua
Amurrioko Udalak urrian hasi zuen aurrekontu parte-hartzaileak osatzeko prozesua. Herritarren ekarpenak jaso ostean, antzeko proposamenak multzokatu eta lehenespen-fasea gauzatu zuten abenduaren 1ean egindako bileran.
Ana Izquierdo parte hartze teknikariak nabarmendu du aurtengo edizioan ekarpen kualitatiboak jaso nahi zituztela lehenespen-fase horretan: "Aurtengo edizioan metodologia aldatu dugu, azken fasera igaroko diren proposamenen arteko lehia sustatu beharrean, hauen inguruan eztabaidatu eta lehentasunak adosteko helburuarekin". Gauzak horrela, 32 dira bozketa fasera igaro diren proposamenak.