Amurrioko Gaztetxea obretan murgilduta dago. Iragan igandean -martxoak 17- lan eguna deitu zuten Gazte Asanbladako kideek San Jose auzoko eraikineko espazioak atondu eta proiektu berriei egokitzeko asmoz.
Alde batetik, entsegu lokala handitzeko obrak egin zituzten, orain arte herriko musikariak elkartzeko erabilitako gela handituz. Bestetik, argazkilaritza eta bestelako sorkuntza prozesuetara bideratuta egongo den espazioa atontzen hasi ziren ere. Asanbladako kideek aurreratu dutenez, aurki emango dute sukaldatzen ari diren proiektuen berri.
Bien bitartean, beste lan egun bat iragarri dute Amurrioko Gaztetxean. Igande honetan elkartuko dira, martxoak 20, 17:00etan. Bertaratzeko gonbita luzatu diote abian dauden proiektuetan, zein Gaztetxean garatu daitekeen beste edozein ekintzatan interesa duen herriko gazte orori. Baldintza bakarra jarri dute: "arropa erosoa eta lan egiteko gogoa eramatea".
ADI ADI ADI
— A.G.A. (@AmurriokoGA) March 16, 2022
Igande honetan lanean jarraituko dugu!!!
Hamaika kontu egiteke ditugulako, hartu mailua eta jarraitu dezagun lan egiten!!
AUTOGESTIOA DA BIDE BAKARRA pic.twitter.com/r8fRE6Sw9S