19:00etan hasi da Amurrio Antzokian Guk Sariaren ekitaldia. Iaz Amurrio Trail Taldeak jaso zuen aitortza, eta aginte makila Nagusilani eman diote kirol elkarteko kideek. Ekitaldiak edadetuek bizi duten bakardadea izan du ardatz, eta horretarako dauden babes sareak nabarmendu dituzte. Horietako bat da Nagusilan Amurrio.
"Amurrion bizimodua hobetzeko laguntzen dutenei ematen diegun esker ona da Guk Saria"
"Amurrion bizimodua hobetzeko laguntzen dutenei ematen diegun esker ona da Guk Saria". Hala adierazi du Udalak, ekitaldiaren aurkezpenean. Iratxe Estrada kazetari amurrioarra arduratu da gidaritzaz, eta Txemi Llano argazkilariaren bideo proiekzioaren bidez omendu dute herriko eragilea. Nagusilaneko partaideek euren bizipenak, esperientziak eta asebetetzea partekatu dituzte ikus-entzunezkoan, jendez betetako aretoaren aurrean. Oihane Almanchel Molinuevo bibolin jolea ere igo da oholtzara, eta zenbait abesti interpretatu ditu ikus-entzule guztien gozamenerako.
Txerra Molinuevo alkateak Nagusilanen ibilbidea eta ekarpena txalotu ditu: "Zaintza lan eta beharrei boluntarioki emandako erantzunagatik omendu nahi dugu Nagusilan. Zorionak! Udalerrian egiten duzuen lanari balioa eman nahi diogu. Jendea laguntzea eredugarria da guretzat". Zentzu horretan, zoriondu baino eskerrak ematea dagokiola aitortu du gobernuburuak, "iaz bezala, zorionak baino eskerrik asko esatea dagokit, milesker egiten duzuen lanagatik".
Nagusilaneko ordezkari gisa Patri Aldama eta Jokin Carames taularatu dira segidan. Biek ala biek, Nagusilanen ekarpena, helburuak eta ekimenak izan dituzte hizpide. Ildo beretik, parte hartzeko deia luzatu diete adin orotako herritarrei. Amaieran, agurra dantzatu diete Nagusilaneko kideei, eta talde argazkia atera ondotik, bibolin emanaldiarekin bukatu dute ekitaldia.