Bigarrenez egingo dute Araban II. Euskarazko Futbol topaketa. 2014-2015 urteetan jaiotako neska-mutilez osatutako taldeek hartuko dute parte, 7-8 urtekoek alegia. Beñat Mendiguren Amurrioko Zerbitzu Soziokulturaletako koordinatzailea ari da prestaketa lanetan, besteak beste, Arabako beste euskara teknikari batzuekin batera: "Helburua da kirol esparruan euskararen erabilera sustatzea. Partaideek, bai jokalari, entrenatzaile zein epaileek, euskaraz aritzeko konpromisoa hartuko dute. Korrikaren testuinguruaren baitan antolatuko da aurtengo edizioa, eta bukaeran talde argazki bat aterako da".
Erantsi duenez, 18 talde etortzea espero dute, guztira, 150 futbolari baino gehiago. "Agurain, Dulantzi, Gasteiz, Laudio eta Amurrioko taldeak izango dira".
Futbolean euskara sustatzeko egitasmoak
Igandekoa ez da martxan dagoen proiektu bakarra. "Amurriora etorriko diren jokalarien herrietako bakoitzean, egitasmoak martxan daude, edo egon dira. Araban esparru horretan asko dago egiteko, baina urrats txiki batzuk eman dira, eta horiek ikustarazi nahi dira. Arabako Foru Aldundia eta Futbol Federazioa egitasmoaren parte ere badira", zehaztu du.
"Aurtengo helburua Araban, futbolean ere euskaraz aritzea ekimen naturala dela ikustaraztea da. Jokalari askok lehenbiziko aldiz beste jokalari batzuekin euskaraz hitz eginez ezagutuko dute elkar"
Futbolean ere euskara sustatzea nahi dute: "Aurtengo helburua Araban, futbolean ere euskaraz aritzea ekimen naturala dela ikustaraztea da. Jokalari askok lehenbiziko aldiz beste jokalari batzuekin euskaraz hitz eginez ezagutuko dute elkar. Egun, Araban, adin tarte horretako ikasle ia denak euskaldunak dira eta euskaraz ikasten dute. Euren guraso asko ere euskara ulertu eta hitz egiteko gai dira. Zeresanik ez entrenatzaile gazteen kasuan. Horren inguruko hausnarketa eta ariketa praktiko bat egin nahi da".
Egitaraua, prest
Igande goiza baliatuko dute elkar ezagutu eta euskaraz gozatzeko. 10:00-13:00 artean izango da ekimena, Reforreko futbol zelaian. Hain zuzen, 4 partida jokatuko dira, 15 minutuko iraupenarekin. "Talde bakoitzak 4 partidu jokatuko ditu, txandaka. Topaketa hau lagunartekoa izango da, eta ez da lehiaketa bezala planteatuko. Denak izango dira garaile, eta partaide denek izango dute oparitxoren bat eta mokadu bat jateko aukera".
Korrika dela eta, AEK-koekin batera zabaldu dute ekintza, "bertako programazioarekin bat egin dugu eta geure normalizaziorako aletxoa, AEK-ko lagunekin partekatu. Hori ere goraipatu nahiko genuke, euskararen normalizazioan lanean dihardugun eragile ezberdinen elkarlana helburuetako bat delako".
Amurrio, ekimen pilotu
Amurrion urteak daramatzate Etorkizuna Futbol Taldeko begiraleak euskarazko futbol terminologian trebatzen. Fitxak ere osatu dituzte entrenamenduak euskaraz egiteko. Udal teknikariaren esanetan, futbol kanpusa euskaraz antolatzeko konpromisoa hartu zuten, eta Euskara Zerbitzutik laguntza eskaintzen diete.
Futbolaz gain, saskibaloira ere hedatu nahi dute egitasmoa: "Zaraobe Saskibaloi taldean ere, euren entrenamenduak euskaraz eskaintzen hasi ahal izateko lehen urratsak ematen hasi dira. Pixkanaka, Amurrioko kirol talde ezberdinetan jarduera horiek euskaraz egitea da asmoa". Hala, klubetako gurasoak, zuzendaritzako kideak, entrenatzaileak eta abar euskarara gerturatzea espero dute.
"Zaraobe Saskibaloi taldean ere, euren entrenamenduak euskaraz eskaintzen hasi ahal izateko lehen urratsak ematen hasi dira. Pixkanaka, Amurrioko kirol talde ezberdinetan jarduera horiek euskaraz egitea da asmoa"
Euskaradunak geroz eta gehiago izanik, kirol elkarteetatik harago zabaldu nahi dute ekimena: "Gure esku dago urrats horiek ematea, eta ez da hain zaila. Helduon kasuan ere, kiroldegi publiko zein pribatuetan, klase batzuk euskaraz eskaintzea, uste baino errazagoa da, zabaldu beharreko mezuak hainbat kirol jardueretan oso bisualak direlako".
Zerbitzu Soziokulturaletako koordinatzailearen aburuz, duela urte asko, Bañueta Kiroldegian inkesta bat egin zuten erabiltzaileen artean, eta %80 euren kirol jarduerak euskaraz jasotzeko prest zegoen. "Egun bereziren baten euskaraz eskaini dira klaseak, mantenu klaseetan adibidez (erabiltzaile gehienak nagusiak dira, eta euskara gutxi dakite), eta jendeak gogotsu erantzun du".
Etorkizunean, beraz, erronka adina aukera daude. Asteburuko topaketa, hortaz, euskararen joko-zelaia handitzeko pauso bat gehiago baino ez da izango.