Amurrioko Mendiko Lagunak elkarteak aurtengo bekaren irabazlea jakinarazi du: Tasio Martin. Hain zuzen, 'Zanskar' izeneko espedizioa egingo du 2022ko udan. "2022ko 'mlbeka' Tasio Martin urduñar eskalatzaile eta alpinistarentzat izan da", zehaztu du eragileak sare sozialetan. Ildo beretik, abenturarako zorte onena opatu diote: "Uda honetan Indiako Himalaian egiten saiatuko diren proiektuetan zorterik onena opa diogu berari eta bere taldeari". Proiektuaren nondik norakoak webgunean daude irakurgai.
Lleidan (Herrialde Katalanak) bizi da duela 2-3 urtetik Tasio Martin urduñarra, baina ez du eskualdearekiko lotura galdu. Udan joango da Indiara, Himalaiako Zanskar haranera esplorazio-alpinismoa egitera. Hala zehaztu du beka jasotzeko osatutako laburpenean.
Oraingoan, ordea, Kataluniako Alpinismo Taldearekin egingo du bidaia, 20-30 urte bitarteko 10 gazterekin. Dena den, Roger Cararach eta Marc Toralles mundu mailako alpinistak eta goi-mendiko gidak izango dituzte bidelagun. "Guztiok daukagu esperientzia bai eskaladan bai goi-mendian", erantsi du Martinek.
Mendiko Lagunak bekaren bitartez 600 euroko laguntza ekonomikoa izango du Tasio Martinek. 2023ko beka deialdia, udazkenean irekiko dute.