Aiaraldeko Ikamak oharra plazaratu du salatzeko Zaraobe Institutuko zuzendaritzak ez duela baimendu bere eskaria martxoaren 29an lanuztea egiteko, ikasleek parte har dezaten 12:00etan egongo den mobilizazioan.
Erakundearen helburua da Amurrioko kaleetara ateratzea ikasleek "pandemiaren ondorioz bizi dituzten gaitz psikologikoei erantzun bat ematea" eskatzeko, "bizi dugun kontrola salatuz, hezkuntza duina aldarrikatuz…"
Ikamak azpimarratu du ikastetxeko zuzendaritzak ez diela baimenik eman horretarako: "gure eskaera atzera botatzeko saiakera egin zuen 'hilabete batean hainbeste greba izatea haientzat lio bat' zela esanez. Erantzun horren aurrean, ikasleok salatu genuen hori ezin zela aitzakia izan eta berriro saiatu ginen. Pertsona batetik bestera mareatu ondoren, honakoa da jasotzen dugun erantzuna: irakasleak ikasleak mehatxatzen dituzte, esanez grebari baiezkoa emanez gero, ez zietela ikasle horiei gero klasera sartzea baimenduko eta grebara batzen ziren ikasleek falta eramango zutela".
Zuzendaritzaren bertsioa
Aiaraldea Komunikabidea Zaraobe Institutuko zuzendaritzarekin harremanetan jarri da eta ikastetxeko arduradunek azaldu dute eurek proposatu dietela ikasle erakundeei mobilizazio bateratua egitea. Izan ere, Ikasle Abertzaleak greba eguna deitu du biharko. Horrez gain, ostiralean ere greba eguna aurreikusi zuten hezkuntzako sindikatuek, baina, azkenean, bertan behera geratu da.
Testuinguru horretan, zuzendaritzaren proposamena izan da bi ikasle erakundeen artean mobilizazio bakarra adostea.