Amurrrioko Liburu Azokak badu data: maiatzaren 4tik 8ra ospatuko dute. Urtero gai bat aukeratzen dute ardatz gisa, eta amatasuna izango da oraingoan oinarri. Euskadiko Liburu Ganbarak eta Amurrioko Udalak antolatzen dute ekimena elkarlanean, eta 14 postu egongo dira guztira, aurreratu dutenez.
Ordutegiari dagokionez, 11:00etatik 14:00etara eta 16:30etik 20:30era topatuko dituzte herritarrek etxolak zabalik. Horrez gain, bisitariek amatasunari buruzko erakusketa bat izango dute ikusgai. Gainera, literatur kontsumoa sustatzeko asmoz, aurtengo nobedadeetan %10eko beherapena eskainiko dute, "baita diskografien atalean ere, eta beherapenen gunea ere egongo da". Hala adierazi du Asier Muniategi Euskadiko Liburu Azokako koordinatzaileak.
Liburu Azokaz gain amatasunari buruzko erakusketa egongo da ikusgai, hori izango baita aurtengo feriako gai nagusia
Egileen artean Toti Martinez de Lezea, Jon Arretxe eta Kirmen Uribe nabarmendu dituzte, "baina tokiko idazleen lanak ere asko eskatzen dira: Inma Roiz, Txani Rodrigez, Miren Palacios eta Jose Luis Urrutiarenak, besteak beste".
Ohi gisa, azokak iraun bitartean zenbait idazleren presentzia espero da, "Miren Palacios, Javier Sagastiberri, Inma Roiz eta Jose Luis Urrutia egongo dira printzipioz; nahiz eta garaian garai azken orduko aldaketak egon daitezkeen", erantsi du arduradunak.