Aiaraldeko Greba Batzordeak ekitaldia deitu du gaur 18:30ean Amurrion. San Anton plaza hartu dute lan istripuen kontrako egitasmoa aurkezteko. Hain zuzen, eskualdean kontagailuak jarriko dituzte errealitate sozioekonomiko hori bistaratzeko.
Batzordeko kideek irudikatu dute eskualdean gertatutakoa esparru horretan, azken urteotan zendu diren behargin guztiak aipatuta. Zehazki, azken bi urteotan Aiaraldeko 10 lagunek galdu dute bizitza lanean. Hildako bakoitzagatik, herritar bat etzan da lurrean eta plastiko termiko batekin estali dute. Ekitaldiaren amaieran, plaza plastikoz beteta zegoen.
Hori egiten zuten bitartean, batzordeko kideek salatu dute lanean hiltzen diren behargin gehienek baldintza prekarioak dituztela. Halaber, istripuen kopuru handia azpimarratu dute, baita lan gaixotasunak -asko aitortu gabeak- edota ordainduta ez dauden zaintza lanak ere, emakumeek egiten dituztenak.
Ekitaldia amaitzeko, San Anton plaza utzi eta parte-hartzaileek herrigunean dagoen kontagailura jo dute. Lore eskaintza egin dute bertan, zendu diren langileen omenez. Kontagailuak aurten Euskal Herrian lanean erahildako langile kopurua adierazten du. Aurreratu dutenez, datozen hilabeteetan Laudion, Urduñan eta Orozkon ere jarriko dituzte kontagailuak.
Gaur dinamika berri bat abiatu dugu Aiaraldean
— Aiaraldeko Greba Batzordea (@AiaraldeaGreba) April 27, 2022
Amurrion jarri dugu Euskal Herrian jazotako lan istripu mortalen lehenengo kontadorea eta datozen hilabeteetan eskualdeko herri guztietara zabalduko dugu.
Ez ditugu erailketa hauek normalizatuko!
HARIA pic.twitter.com/24gUocZxWG