Aurten ere 'Poetak Maiatzan' jaialdia helduko da Amurriora. Arabako Foru Aldundiak eta Eusko Jaurlaritzak, besteak beste, sustatzen dute ekitaldia eta ez da eskualdea bisitatuko duen lehen aldia izango. Aurten, dena den, eskualdeko ordezkari batek parte hartuko du. Zehazki, astelehenean, maiatzaren 9an, Leire Ugartek bere olerkiak irakurriko ditu bai Aresketa Ikastolan zein La Casonan. Ikastetxean 12:00etan izango da hitzordua hezkuntza zentroko gazteekin eta La Casonan, ordea, 19:00etan.
Ugarterekin batera Texasko Curtis Bauer, Sevillako Carmen Vargas eta Bilboko Idoia Carramiñana bertaratuko dira. Poesia errezitatu ez ezik, publikoarekin solasaldia ere izango dute.
Leire Ugartek azaldu dio Aiaraldea Komunikabideari antzerkiko munduko lagun batek proposatu ziola parte hartzea eta horretarako zuzendaritzaren helbidea eman ziola. Urduñarrak berandu idatzi zion antolakuntzari eta egitaraua, printzipioz, erabat itxita zegoen. Hala ere, "euskarak ez zuen presentziarik, are gutxiago gazte euskalduna izanda, hortaz, toki bat egiteko moldatu ziren", azaldu du Ugartek.
Maiatzaren 9ko emanaldiaz gain, beste bat izango du Los Cañosen hilaren 20an.