2022ko Txakolin Eguneko enbaxadorea zara. Nola jaso duzu albistea?
Ez nuen festa ezagutzen, asko harritu ninduen izendapenak. Bittor Astobizaren bidez jaso nuen gonbidapena. Aspaldi ezagutu nuen Bittor; Gasteizen ardoaren inguruan egindako Gasteiz Wine City ekitaldi gastronomikoan kointziditu genuen, Ramon Roteta eta Kristian Pielhoff Bricomaniako aurkezlearekin batera. Urte asko dramazkit kalea egiten eta ekitaldi eta lehiaketa gastronomikoak aurkezten.Esan bezala harrituta baina ilusioz jaso nuen gonbitea.
Ezagutzen zenuen Arabako Txakolina jatorri-deitura?
Banekien bazegoela, Bizkaiko eta Gipuzkoako txakolinekin batera, baina askoz gehiago ez. Ez nekien urtero festa antolatzen zenik ere. Esperientzia berria eta polita izango da ziur.
Arabako Txakolinaren enbaxadore eta kazetari bezala, nola hauspotu daiteke tokiko produktu hau?
Galdera oso zaila da. Ahal dudan neurrian Arabako Txakolina eramango dut nirekin, eta hau promozionatuko dut. Tokiko produktuei hauspoa ekitaldi desberdinetan ezagutzera emanez ematen zaie. Sare sozialak ere badira tresna garrantzitsua, ni oso aditua ez naizen arren.
Zer espero duzu Amurrioko Txakolin egunaz?
Oraindik ez diot neurria hartu enbaxadore izatearen ardurari. Ez dakit zehazki zer egin behar dudan. Badakit etxera txakolin askorekin bueltatuko naizela, baina askoz gehiago ez (barreak).
Kriston ilusioa egiten dit egunak, baita lotsa puntu bat ere. Ohorea da horrelako errekonozimendu bat jasotzea, gainerakoek zure lana estimatzea. 25 urte daramazkit EITBn lanean. Nire ibilbideari aitortza gisa hartzen dut, nolabait, enbaxadore izatea, eta gozatzera joango naiz Amurriora.
25 urte daramatzazu lanean. Zein izan da zure ibilbidea?
Zarauzko telebistan hasi nintzen lanean karrera amaitu bezain laster. Hori izan zen nire benetako eskola. Kazetari gutxi ginen eta gauza asko egiten genituen. Asko ikasi nuen bertan. Euskal Telebista Publikora egin nuen salto jarraian. Hasieran jantzigintzan aritu nintzen, moda munduarekin harreman estua izan baitut nik. Gero Esta es mi gente telebista saioan hasi nintzen lanean. Ordutik denetarik egin dut: erredaktore, zuzendari, zuzendari-orde... orain albistegietan nago. Horrekin batera, eta lehen esan bezala, urte asko dira ekitaldi gastronomikoak aurkezten ditudala.