Hainbat haur bertaratu ziren Amurrioko Refor kirol gunera larunbat goizean, Arabako Hockey Federazioak antolatutako entrenamendu saio irekietan parte hartzeko.
Ez da ekimen isolatu bat izango, ekainean zehar kirol horri lotutako jarduera publiko ugari egingo baitira eskualdean. Hala azaldu du Hector Borgek. "Datorren igandean, ekainak 5, entrenamendu irekia egingo dugu 16 urtetik gorako gazteentzat", zehaztu du Arabako Federazioko eta Ganbegi hockey taldeko kideak.
Laudioko talde horrek Hockey Eguna antolatuko du baita ekainaren 11n. Aurtengo edizioa "xumeagoa" izango dela aurreratu du Borgek, "hainbat gauza" aldatu behar izan dituztelako, "Udalak eskatuta".
18an, aldiz, gurasoen artean antolatutako ligaren azken norgehiagoka egingo dute, eta umeentzako beste entrenamendu ireki bat burutuko dute hurrengo egunean, oraingoan Gardeako zelaian.
Kanpusa dohainik
Hockey eta multikirol kanpusarekin amaituko dute denboraldia. "Dohainik izango da. Arratsaldero egingo dugu saioa umeak bertaratu eta parte hartzeko. Ordutegia zehazteke dugu oraindik, baina 16:30-17:00etatik aurrera izatea aurreikusten dugu".
Uztailan atsedena hartuko dute, baina ez dira irailera arte egongo oporretan, San Roke jaien egitarauaren barruko txapelketak izango dituztelako abuztuan.
Argazkiak: Arabako Hockey Federazioa