ARGAZKIAK

Hezkuntza-lerro bat ixteko erabakiaren aurka protesta egin dute Mendiko Eskolan

Amurrioko Mendiko Eskolako langile, guraso eta ikasleek elkarretaratzea egin dute gaur goizean, Eusko Jaurlaritzak hezkuntza-lerro bat ixteko hartutako erabakiaren aurka protestatzeko.

Datorren ikasturtean hezkuntza-lerro bat gutxiago eskaintzea erabaki du Eusko Jaurlaritzak Amurrioko Mendiko Eskola publikoan. Hain zuzen ere, 3 urteko gela lerro bakarrean batuko dute 2022-2023 ikasturtean, 2019an jaiotako 23 ikasle bilduta guztira. "Orain arte 23 ikasle horiek bi hezkuntza-lerrotan banatuta egon dira, baina datorren ikasturtean ratioak jaitsi beharrean, guztiak elkartzea erabaki du Hezkuntza Sailak", azaldu diote Aiaraldea Komunikabideari gaurko elkarretaratzean. Salatu dute ere, maila horretako ikasle bat matrikulatu ezinik geratu dela, eta, ondorioz, Zabaleko ikastetxera joan beharko dela datorren ikasturtean.

Uste dute ulergaitza dela 2023-2024 ikasturterako ikastetxe publiko zein itunpekoetan ratioak jaistea erabaki duen Eusko Jaurlaritzak, datorren ikasturterako kontrako erabakia hartu izana. Hala azaldu dute: "Mendiko Eskola osatzen dugun komunitateko kideak haserre eta engainatuta sentitzen gara. Horrelako erabakiek haurrak hezkuntzan lehentasuna ez direla pentsatzera garamatzate".

Hezkuntza-lerroen itxierak ikasleengan eragin negatiboa izateaz gain, eskolako gainerako giza-baliabideetan ere kaltea izango duela ohartarazi dute; hala nola, irakasle, zuzendaritza kide eta bestelako langileen kopuruan.

Sinadura bilketa

Gaurkoa lehenengo protesta izan da, baina gehiago egingo dituztela iragarri dute. Bien bitartean, sinadura bilketa ere abiatu dute, ikastetxeko maila guztietan bi hezkuntza-lerro mantentzea eskatuz.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide