Uhandre plataformak oharra zabaldu du salatzeko apirilean 7 hektareako pinudia moztu zutela: "14 futbol zelaiko tamainako lursaila". Talde ekologistak gogor kritikatu du gertakaria arauz kontrakoa dela. Izan ere, ustiatze txandara heltzeko pinudiek 30 edo 35 urte bete behar dituzte, eta honek 20 inguru zituen.
Mozketa goiztiar hori kaltegarria dela azpimarratu dute: "Baso ekosistema suntsitzen du, lurren higaduraren arriskua handitzen du, eta ezaguna da zuhaitz helduenek CO2 gehiago xurgatzen dutela".
Eukaliptoa landatzea helburu
Uhandreaken iritziz, legez kanpoko mozketak xede argia izan du; lurzoru hori eukaliptoz betetzea. Berez, AmurrioHiri Antolamenduaren Plan Orokorra prestatzen ari da eta, antza, espezie hori landatzea debekatuko dute. Plataformaren aburuz, eukaliptoak bioaniztasuna jartzen du arriskuan, eta gogoratu duenez, Aiaraldean zelulosa ekoizteko baliatzen den landaketen %12,8 eukaliptoa da jadanik.
Zentzu horretan, elkarteak aldarrikatu du Gipuzkoan eta Bizkaian neurriak hartzen ari direla eukaliptoaren landaketa berriak ekiditeko, eta gauza bera exijitu diote Arabako Foru Aldundiari, ongizate publikoaren onurarako.
Neurriak jabearen kontra
Bide batez, eta aintzat hartuta jabeak mozketen epeak bete ez dituela, Uhandrek aipatu du Arabako Foru Aldundiak lursailaren jabea zigortzea espero duela, baita dirulaguntzak itzultzera behartzea ere, baldin eta jaso baditu. Berez, mozketa ez da toki ezkutuan egin, A-625 errepidearen parean jazo baita, Amurrioko sarreran, hain zuzen.