Orain Amurriok prentsa oharra zabaldu du azaltzeko zein den bere proposamena gazteek etxebizitza alokairurako dirulaguntza jasotzeko. Zehazki, neurria 18 eta 35 urte bitarteko herritarrei bideratuta dago. "Diru-laguntzaren zenbatekoari dagokionez, hileko alokairuaren %30 eta %50 artean izatea proposatzen dugu, gehienezko mugekin eta eskatzaileek justifikatutako urteko diru-sarrera gordinen arabera. Hau da, laguntzaren progresibotasunaren irizpidea aplikatuko da errentaren arabera", argitu dute.
Taldearen helburua da ahalik eta lasterren onartzea udalbatzan laguntza hori lortzeko prozedura. Orain Amurriok aldarrikatu du bere ekimenaren ondorioz erabaki dela aurrekontuetako 30.000 euro gastatzea horretan, baina, aldi berean, adierazi du egitasmoak ez dituela konpontzen etxebitza arazoak: "Neurri honen bidez, berariazko biztanleria-sektore bati, hots, gazteriari, lagunduko diogu, baina ez dugu osorik konponduko gainerako herritarrek etxebizitza eskuratzeko duten aukera. Horregatik, gogorarazi nahi dugu proposatu genuela lurzoru-parke publiko bat sortzea, gizarte-beharrak hein batean konpentsatuko dituzten mota guztietako eraikinak kokatzeko. Sustapen publikoko etxebizitzak, bai Eusko Jaurlaritzak sustatuak, bai udalerrian egiten diren udal sustapenekoak, alokairu sozialeko etxebizitza gisa erabiliko dira. Babes publikoko etxebizitzak alokairu sozialean sustatzeko konpromisoa dugu".