Ekintzaz betetako asteburuak izango dira ekainekoak Aiaraldean. Pandemiaren ondorioz bertan behera geratutako ekintza asko itzuliko dira egutegira. Horietako bat da Amurrioko Gazte Asanbladaren jaia, 2019tik egiten ez zena.
Eragile horrek 15 urte bete ditu aurten, eta egun osoko egitaraua egingo dute datorren larunbatean -ekainak 11- hori ospatzeko. Gazte Asanbladak hainbat proiektu garatu ditu azken hilabeteetan San Jose auzoan dagoen gaztetxean, eta bide horretan beste urrats bat egiteko baliatu nahi dute eguna.
Kalejira musikatuarekin hasiko dute eguna, 13:00etan. Bi ordu beranduago egingo dute bazkaria. Tiketak Txokogorri eta Atxubin daude salgai, eta Gazte Asanbladaren Instagram kontutik ere eskatu ahalko dira.
Bingo musikatua egingo dute bazkalostean. Gazte jolasekin eta Elektrotxusmaren kalejirarekin beteko dute arratsaldea, iluntzean kontzertuei bide emateko.
Musika eskaintza zabala
Gauean musika izango da protagonista nagusia. Atxurre, Maixa Ta Malakias eta Beranduegi erromeria igoko dira Guk eskulturaren aurrean kokatutako eszenatokira, Street Ligth estudioko eskualdeko hainbat rap-kantariaekin batera: Loza, MRT, Kortazar, Jako JK, Polli eta Landa.