Angel Camino artista duela bederatzi egun hil zen, bat-batean, Austrian, RTV Vilafranca hedabidearen arabera. Han zegoen lagun batzuk ikusten, berez, Katalunian baitzuen etxebizitza. Valladoliden jaioa 1953an, baina Euskal Herrian hazia, Angel Caminok kimika ikasi zuen. Dena den, Jorge Oteiza ezagutu ostean, bere sorkuntza grina topatu zuen.
1974an Kataluniara joan zen bizitzera eta han ibilbide luzea abiatu zuen artearen munduan. Alde batetik, irakasle izan da urte luzez eta, bestetik, hainbat sari eta beka eskuratu ditu. Adibidez, 2001ean Kyonggidon, Korean, jaso zuen aitortza.
Guztira, zortzi eskultura utzi ditu eremu publikoan, horietako bi Euskal Herrian. Bata, 'Ama Lur' izenekoa, Arrasaten dago. Bestea, 'Guk', Amurrion dago 2003. urtetik. Artelan hori osatzeko 31 tona altzairu urtu zituen, korapilo bati forma emateko. Korapiloak hainbat amurrioarren izenak ditu idatzita eta herritarren arteko lotura islatzen du.
Amurrioko Udalak gaur jaso du bere heriotzaren albistea eta sare sozialetan doluminak adierazi ditu.
Gaur Ángel Camino eskultorearen heriotza ezagutu dugu, #Amurrioko GUK eskulturaren sortzailea, besakada bat familiari. Goian bego
— Amurrio Udala Ayto (@AmurrioUdala) July 5, 2022
Hoy hemos conocido el fallecimiento del escultor Ángel Camino, creador de la escultura del GUK de #Amurrio, un abrazo a la familia. Descanse en Paz pic.twitter.com/MjdIaYAAW6