Paula Barcelo gazte amurrioarra izango da protagonista bihar ETB1 kateko Jateko modukoa saioan. Denboraldiko azken saioa izango da eta 22:30ean emitituko da. Klaudio Landak gidatzen du programa eta sukaldaritza du ardatz. Lau lagunek hartzen dute parte atal bakoitzean: sukaldean arituko diren hiru kide eta gonbidatu bat. Azken rol beteko du Barcelok biharko programan.
"Festazale alai" moduan aurkeztu dute amurrioarra programaren aurrerapenean. "Instagram bidez kontaktatu zuten nirekin", azaldu dio gazteak Aiaraldea Komunikabideari. Aitortu duenez, "asko pentsatu zuen" baiezkoa eman aurretik: "Ez naiz lotsatia, baina lotsa ematen zidan platoan 40 kamararen aurrean egoteak".
Lotsak lotsa, ez da hartutako erabakiaz damutzen. "Esperientzia izugarria" izan da programaren grabaketa Barcelorentzat: "Telebista nola egiten den ikustea, platoan egotea, egun guztia igarotzea gidoia idazten duten pertsonekin eta gero emaitza ondo ateratzen dela ikustea... dena izan da ona".
Gauzak hala, jende orori luzatu dio biharko programa ikusteko gonbita, "barre asko" egiteko aukera emango duela ziurtatuta.
Hemen ikusi daiteke saioaren aurrerapena: