15.000 euro bideratuko dituzte Amurrioko Udal Musika Eskola hobetzera. Hala iragarri dute PSE-EEko kideek ohar baten bidez, eta nabarmendu dute eurek proposatu zutela diru partida hori udal aurrekontuetan sartzea.
“Datozen egunetan ekingo zaio teilatu-hodiak eta sabaia garbitu eta zigilatzeari. Horrez gain, entsegu gela txikiko pareta bat konponduko da eta eskolaren teilatu-alde bat ere birgaituk da. Era berean, gela eta korridoreak margotuko dira”, aurreratu dute sozialistek.
Nabarmendu dutenez, eraikinak hainbat gabezia ditu aspaldidanik. David Romero zinegotziak nabarmendu du espazioko hormak “duela bi hamarkada” margotu zirela azkeneko aldiz, eta nabaria dela “filtrazioen eta hezetasunaren eragina”.
Horregatik, soluzio egokiena eskola mugitzea izango litzatekeela uste dute sozialistek eta, hori dela eta, konponketa koiuntural moduan planteatzen dituzte obrak.
Gauzak hala, hartutako erabakiaren egokitasuna defendatu dute sozialistek, gaur egungo egoera “erabat sostengaitza” dela iritzita: “ezin da eskola kokaleku berri batera eramatera itxaron Amurrioko bizilagunei azpiegitura eta zerbitzu duin batzuk eskaini ahal izateko”.