JAI HERRIKOIEN ALDEKO BATZORDEA

“Parte hartzean oinarritutako jai herrikoiak dira jairik oparoenak”

Aste honetan egin dute publiko egitaraua. / Jai Herrikoien Aldeko Batzordea

Jai Herrikoien Aldeko Batzordeak prest du aurtengo egitaraua. Parte hartzea oinarri, egitarau oparoa prestatu dute abuztuaren 11tik 18ra. Dozenaka lagun aritu dira antolakuntzan, eta horietako bi dira Borja Guillen eta Josu Arrieta. Prestatutakoa aletu diote Aiaraldea Komunikabideari.

Jai Herrikoien Aldeko Batzordeak prest dauka egitaraua aurtengo Amurrioko Jaiei indarberriturik heltzeko. Hilabete luzetako lana izan da, eta irrikaz daude batzordean parte hartzen duten eragile zein norbanakoak egindako lanaren fruituak jasotzeko. Antolakuntzan aritu diren kideetako bi dira Borja Guillen eta Josu Arrieta. Zortzi urte daramate biek egitarau herrikoiaren alde lanean.

“Gure betiko apustuan berretsi, eta koronabirusa iritsi aurretik bezalako egitarau anitz eta parte hartzailea osatzen ahalegindu gara”, nabarmendu dute Guillenek eta Arrietak. Kontsumora mugatutako jai eredutik harago, “jaiaren eremua zabaldu eta herritar ororen parte hartzea bermatuko duen eredua” dute ipar Jai Herrikoien Aldeko Batzordeko kideek. Izan ere, nabarmendu dute gehienetan gaueko aisialdiarekin lotutako egitarauak gailentzen direla herrietako jaietan, eta inertzia horrekin apurtzeko borondatea du prestatutako eskaintza herrikoiak.

Egitarau oparoa

Iguarrakoaren jaitsiera baino egun bat lehenago abiatuko dituzte Amurrioko Jai Herrikoiak: abuztuaren 11n jaurtiko dute txupin herrikoia eta orduan lehertuko da festa-giroa parkean atonduko duten txosnagunean. Abuztuaren 17ra bitarte kontzertuak, herri bazkariak, lehiaketa gastronomikoak, jolasak, kalejirak, haurrentzako ekintzak... orotariko ekintzak burutuko dituzte.

Parkeko zein Gazte Karpako oholtzara igoko diren musika taldeen artean daude Ibil Bedi, Zutik, 4 Bancos, El Polli, Matx, Dj Reimy, True, Tox eta Kitto ft. Pottors Destroyres, Dantzetan Jarrai edota eskualdeko rapeatzaileak.

Babiora Igoera Oxigenorik Gabe garagardo kutxen eskalada saioa egingo dute aurten ere. Iaz, pandemia betean, berreskuratu zuten Mendiko Lagunak taldeak urte luzez antolatutako ekintza arrakastatsua. Aurtengoan DJ Marauri gasteiztarrak girotuko du abuztuaren 15eko ekintza.

Aldarrikapenak ere izango du bere tokia. Otsemeak Neska* Gazte Taldeak, SOS Aiaraldea Plataformak edota Sarek mobilizazio bana deitu dute egitarauaren barruan.

Aurreratu dutenez, “aurtengoak oso jai onak izango dira”.

Antolakuntzarik gabe, jairik ez

Egitarau oparo hori, ordea, ez da hutsetik sortu. Herriko hamaika eragilek eta norbanakoren antolakuntza eta lan boluntarioak atera du aurrera. “Azken urtean, gainera, partaide gehiago bertaratu dira Jai Herrikoien Aldeko Batzordera. Horrek aberasten du egitaraua eta eragiten du pertsona anitzak elkartzea festa-giroa aurrera ateratzeko”, azpimarratu du Borja Guillenek.

Pandemiak, ordea, aldatu egin ditu gizartearen lehentasunak oro har, eta Euskal Herrian festetarako giroa sumatzen duten arren, jendea eredu herrikoietatik aldendu izana igarri dute ere: “Hiru urte igaro dira txosnarik eta jai herrikoirik gabe, eta ezinbestekoa da jendea berriro aktibatzea. Parte hartzean oinarritutako jaiak dira jairik aberatsenak. Guk herria eraikitzea dugu helburu”.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide