Internet bidez erositako paketeak Correosen bulegoan jaso, bidali eta itzultzeko aukera izango dute aurrerantzean Amurrioko bizilagunek, asteko 7 egunetan eta eguneko 24 ordutan. CityPaq zerbitzua atondu du posta zerbitzu publikoak horretarako, 20 buzoirekin. “Hartzailea da bidalketa noiz egin edo jaso erabakitzen duena, zerbitzua pertsona bakoitzaren gorabeheratara moldatzen delako”, azaldu du Correosek prentsa ohar baten bidez.
Zerbitzua baliatzeko beharrezkoa izango da erabiltzaile moduan alta emanda egotea, Citypaqen edo Corresen webgunean sartuta. Herritarrek bost egun izango dituzte paketeak jasotzeko. Epe horretatik aurrera, Correosen bulegoaren barruan egongo da paketea, beste 15 egunez. Hala ere, posta zerbitzuko arduradunek nabarmendu dute bidalketa gehienak 20 ordu baino gutxiagoan jasotzen direla bataz beste, eta hartzaileek mezua jasotzen dutela horretarako.
Horrez gain, Internet bidez erositako produktuen itzulketarako ere baliatu daiteke zerbitzu berria, eta horretarako ez da beharrezkoa buzoietan tokia aurretik erreserbatzea.