Indartuta helduko dio Amurrio Clubek denboraldi berriari. Amurrioko futbol klubak hainbat gorabehera bizi izan zituen aurreko denboraldiaren amaieran. Uztailaren 15ean egin zuten bazkideen batzarra, eta bertan aurkeztu zuen bere dimisioa Miguel Angel Jauregi Unanuek, orain arte klubaren presidentea izandakoak. Orduan abiatu zuten zuzendaritza berria hautatzeko prozesua.
Gauzak hala, sukalde lanetan murgilduta egon dira klubeko kideak udan zehar, eta irailaren 2an jakinarazi zuten nork zuzenduko duen kirol elkartea hemendik aurrera. Laurentz Ibarrola Bedmar izango da presidentea, eta beste 12 pertsona izango ditu bidelagun.
"Aro berri bat"
Pertsona horietako bat da Iñigo Fraile. Berak azaldu dizkio Aiaraldea Komunikabideari Amurrio Cluben egondako aldaketak. Izan ere, kluba zenbait gatazketan murgilduta egon zen urtearen lehen zatian. Jokalari batzuek soldatak ez ordaintzea leporatu zioten zuzendaritza zaharrari, besteak beste. Baina Frailek ziurtatu du arazo horiek konponduta daudela dagoeneko, eta aro berri baten hasiera iragarri du.
Ildo horretan, argi zehaztu ditu zeintzuk izango diren klubaren aurtengo helburuak: “egonkortzea, ekonomikoki zein kirolaren aldetik”. Aurrendeboraldiko partidetan murgilduta daude jokalariak uneotan, eta iraileko azken asteburuan ekingo diote lehiatzeari. Aurrera begira, Frailek aurreratu du ‘Amurrio B’ bat sortzea ere dutela buruan, baina ez du ezer aurreratu nahi izan, “urratsez urrats” joango direla argudiatuta.
Amurrioko beste futbol klubekin zubiak eraikitzea ere dute helburu. Harremanak sendotu nahi dituzte Etorkizuna eta Kaskagorri taldeekin, etorkizunean “lerro bakarra” eratu ahal izateko, 6 urtetatik lehen taldera joango dena. Modu horretan, honakoa lortu nahi dute: “6 urterekin futbolean hasten den haur batek ortzimugan lehen taldea izatea”.
Horrez gain, zaleengan ere jarri nahi dute begirada. “Jendea partiduak ikustera animatzea nahi dugu, eta apurka-apurka zalego bat eratu ahal izatea”. Horretarako lehen urratsa eman dute dagoeneko: bazkidetza kanpaina abiatzea. Amurrioclub.eus webgunean topatu daiteke horri buruzko informazio guztia.
Ateak irekita
Bukatzeko, Frailek nabarmendu du klubaren zuzendaritzaren ateak irekita daudela interesa duten herritar guztientzat. “Klubaren etorkizunaren alde apustu egin nahi genuen zenbait pertsona batu gara zuzendaritzan, horretarako beharra ikus genuelako, baina ateak irekita daude ekarpena egin nahi duen ororentzat”.