Bi urteko etenaren ostean, igandean -irailak 25- ospatuko dute 'Minbiziaren Aurkako Martxaren III. edizioa' Amurrion. Aurreraka eta Minbiziaren Aurka Araban elkarteek antolatu dute elkarlanean egitasmoa beste behin, eta gaur goizean egindako agerraldian eman dituzte horren gaineko argibideak.
Txerra Molinuevo alkateak ibilaldian parte hartzera gonbidatu ditu amurrioarrak. “COVID-19ak eragindako pandemia dela ete, bi urtez ez dugu martxa hau egin; eta inoiz baino gehiago animatu nahi ditugu herritarrak parte hartzera eta marea berde handia sortzera, ikerketari laguntzeko” nabarmendu du Molinuevok.
2030 urterako %57tik %70era handitu nahi dute minbizia dutenen biziraupena
Ikerketa helburu
Minbiziaren Aurka Araban elkarteko lehendakari berriak, Miren Bilbaok, azpimarratu du martxan bildutako diru guztia minbiziaren kontrako ikerketara bideratua izango dela. Izan ere, azaldu duenez, ikerketa da urtean 100.000 herritarrei baino gehiagori diagnostikatzen zaion eritasun honi aurre egiteko modu bakarra. “Funtsezkoa da biziraupen baxueneko minbizien ikerketari laguntza handiagoa ematea; pankreakoari, birikietakoari, hestegorrikoari, eta gibelekoari, hain zuzen ere” erantsi du Bilbaok.
Elkarteak helburua ezarri du 2030. urteari begira: biziraupena %57etik %70era handitzea. Halaber, bizi-ohitura osasungarrien garrantzia ere azpimarratu du Bilbaok, prebentzio neurri gisa. Zentzu horretan, minbizien %44 bizi-ohitura osasungarriekin ekidin daitekeela gogorarazi du.
Euria egin arren, denak martxara
Iganderako eguraldi iragarpenak onak ez diren arren, martxan parte hartzearen garrantzia nabarmendu dute Aurreraka emakume taldeko kideek. Ibilaldiak 7 kilometroko luzera izango du, eta San Anton Plazatik abiatuko da 10:30ean.
Izen ematea bihar itxiko dute, baina egunean bertan ere egin ahalko da. Bihar San Anton plazan jarriko dute aurrez aurreko inskripzio puntua, eta Internet bidez egiteko aukera ere egongo da bihar iluntzera arte, amaurreraka@gmail.com helbide elektronikoan. Izen ematearen prezioa 10 eurokoa izango da.