Gaur 18:00etan Amurrioko Katekesi Aretoak film labur baten aurkezpena hartuko du. Hain zuzen, Zaraobe Institutuko sei ikaslek eta Zurrumurruen Aurkako Taldeak egindako pelikula izango da. 15 minutu iraungo du lanak eta horren ostean musika emanaldi txikia egongo da.
Ideia ADSIS Fundazioaren bidez sortu zen. Erakunde horrek kulturartekotasunari buruzko hitzaldiak eskaintzen ditu Zaraobe Ikastetxean eta ikasleei proposatu zien eskolaz kanpoko jarduera; gai horren inguruko pelikula egitea, hain zuzen.
Saioa San Miguel eta Olatz Ruiz ikasleek azaldu dutenez, sei lagun batu ziren eta Amurrioko Zurrumurruen Aurkako Taldeko hainbat gazterekin ekin zioten egitasmoari.
Maiatzean hasi ziren eztabaidatzen zeintzuk ziren islatu nahi zituzten ideiak eta, azkenean, erabaki zuten onena zela herritik bertatik abiatzea. Horrela, Amurriora heldu diren sei herritar elkarrizketatu zituzten euren lekukotzak eta esperientziak jasotzeko.
"Uste dugu oso interesgarria dela, herriko jendea baita. Galdetu genien nolako harrera izan zuten Amurriora heltzean, edo nola sentitu ziren. Batzuek une oso gogorrak bizi zituzten bere herrialdetan eta beharra zuten alde egiteko, adibidez, gerragatik. Badago baten bat ere Amurriora etorri zena maitemindu zelako", azaldu dute Saioa San Miguelek eta Alatz Ruizek.
Ekainean grabatu zuten 15 urteko gazteek film laburra, eta eurek aurkeztuko dute gaur.