Belaiki euskara elkarteak mende laurden darama Baranbioko Euskal Jaia antolatzen. Auzoko euskaldun zahar eta berrien arteko komunikazioak gaztelaniaz izaten zirela jabetuta, soilik euskaldunentzako izango zen jai bat antolatzea otu zitzaien duela 25 urte. Belen Ortueta antolakuntzako kideak azaldu du horrela lortu zutela belaunaldi arteko hizkuntza ohiturak aldatzea: “Urtean erdaren interferentziarik gabe bizitzeko egun bat antolatzeari esker gure arteko komunikazioak euskaraz izatea lortu dugu”. Izan ere, Ortuetak aipatu duen bezala, “ez dago euskara hutsezko ia espaziorik, erdaren interferentziak, ordea, une oro ditugu”.
Euskal Jaiaz gain, Belaikik urte osoan zehar antolatzen ditu ekintzak Baranbioko eta Euskal Herriko kultura euskararen bidez berpizteko. Esaterako, Baranbion antzina Agate Deuna egunean abesten zuten kanta berreskuratu eta auzoko baserrietatik abesten dute urtero. Olentzero eguna ere antolatzen dute eta urtero-urtero hartzen dute parte Korrikan. “Pello Añorga aipatzea gustatuko litzaidake. 25 urte hauetan guztietan gurekin etorri da Olentzero egunean Amurrioko umeentzako ipuin kontalari”, eskerrak eman nahi izan dizkio Belen Ortuetak. Bestalde, euskal dantza eta txalaparta ikastaro ugari egin dituzte, betiere euskaraz.
Era berean, Ortuetak eskerrak eman nahi izan dizkio herritarrei urte hauetan guztietan izan duten lanerako prestutasunagatik, bai eta Euskal Jaiaren hastapenetako urteetan bertsotan aritzen ziren Serapio Lopezi eta Juanjo Respaldizari, askotan musu-truk joaten baitziren. “Haiei guztiei esker Euskal Jaia 25 urtetan egin dugu, etenik gabe”.
Egungo erronka belaunaldi aldaketan dute finkatuta. Gazteak erakartzea kostatzen zaienez, aurten gazte talde bati eman nahi diote antolakuntzaren lekukoa. “Agian haiek beste era batean antolatuko dute, eta horrekin gazte gehiago erakarriko dituzte”, azaldu du Ortuetak.
Jai giroaz ospatzeko egitaraua
Urtero legez, euskaldun bazkaria egingo dute 14:30ean Garrastatxun. Bertara Baranbioko euskaldunak baino ezin dira joan, eta aurrez izena ematea eskatzen dute. Horren osteko bertso saiora, ostera, nahi duen euskaldun oro gerturatu daiteke, izenik eman behar gabe. Bazkalostea bukatutakoan musikaren tartea izango da. 18:30ean dantzarako tartea irekiko dute Patxi eta konpainia taldekoek eta 20:00etan erromeria hasiko Joselu Anayak-en eskutik.