Jon Lozano modu arrakastatsuan itzuli zen lehiaketa ofizialera urriaren erdialdean. Errioxako Torrecilla de Cameros udalerrian izan zen, eta 20 kilometroko eta 1.000 metroko desnibeleko lasterketa hautatu zuen horretarako.
Lozanok lau urte eman ditu lehiaketetan parte hartu gabe. Izan ere, 2018an lesioa izan zuen belaunean eta harrez gero, txirrindularitza egin du.
Edonola ere, urriaren 15ean bere indarrak neurtzea erabaki zuen, "belaunak errespetatzen nauela ikusita", azadu du Lozanok berak. Errioxako lurralde hori ez zuenez ezagutzen, interesgarria iruditu zaitzion izena ematea, eta hautaketa ona izan zela uste du, ez bakarrik laugarren izan zelako sailkapen orokorrean eta lehenengoa Beterano A kategorian: "Oso ongi antolatuta zegoen eta giroa bikaina izan zen".
2018an lesioa izan zuen Jon Lozanok belaunean eta lehiatzeari utzi zion
Gauzak horrela, Lozano lehen postuetan kokatu zen probaren hasieratik, nahiz eta abiatu baino lehen bere sasoiari buruzko zalantzak izan zituen. Amurrioarra bosgarren sailkatua izandakoarekin joan zen ia lasterketa osoan, bosgarren kilometrotik aurrera, hain zuzen.
"Helmugara heltzeko 3 kilometro falta zirenean, erasora jo nuen, eta horrela lortu nuen bakarrik amaitzea. Nire atzetik sartu zena beteranoen sailkapenean bigarren izan zen, eta bosgarren sailkapen orokorrean".
Aiaraldearrarentzat pozgarria izan da lehiatzea berriro "eta Amurrio eta Amurrio Trail ordezkatzea". Etorkizunari dagokionez, Lozanok iragarri du ez duela asmorik lehiaketara itzultzeko lehen egiten zuen moduan, podiuma zapaltzea arrunta baitzen berarentzat, "baina zerbait egingo dut", adierazi du.