Zortzi urte inguruko ibilbidea handitasunez ospatuko du Dantzetan Jarrai taldeak, baita euren senide, lagun eta jarraitzaileek. Izan ere, bi egunetan saldu dituzte agur kontzerturako sarrera guztiak, 250 baino gehiago, alegia. Azaroaren 5ean, larunbatean, izango da ekitaldia, Amurrion.
Jaialdia 17:30ean hasiko da Txokogorri tabernan. Nafarroa Kanta Taldearen emanaldiaz gozatzeko aukera egongo da bertatik abiatuko den kalejiran. Ostean, 19:30ak aldera, kalejira aterako da Burubiorako noranzkoan. Atxurre, Akerbeltz eta Dantzetan Jarrai taldeek osatuko dute gaueko kontzertuen eskaintza. Musikaz gain, afaltzeko aukera ere egongo da Burubion.
Agur esateko unea
Aimar Gutierrezek eta Beñat Bilbaok 2014an sortutako DJ taldea da Dantzetan Jarrai, Bilbaok 2010tik DJ lanak egin baditu ere. “Tertangako jaietan hasi nintzen, lagun batzuek faborea eskatu zidatelako. Gero Amurrioko Aitor Gartziorekin batu nintzen; gustu ezberdinak genituenez, musika eskaintza zabaldu genuen”, azaldu du. “Dantzetan Jarrai osatzeko Laudioko Gaztetxean edo Aiarako Gazte Txosnan elkartuko ginen Beñat eta biok, duela zortzi urte”, gehitu du Gutierrezek.
Taldekideek adierazi dutenez, belaunaldi-ordezkapena egiteko garaia heldu da Dantzetan Jarrai taldearentzat. “Ezagutzen dudan parranda musika pixka bat zaharkitua geratu da eta, nire ustez, politagoa izango litzateke jende gazteagoak egingo balu”, azaldu du Bilbaok. Gutierrez ere iritzi berekoa da: “18 bat urte genituen proiektu hau abiatu genuenean eta bada garaia beste batzuek hartzeko lekukoa”.