Gaur jakinarazi du Amurrioko EAJk udal hauteskundeetako alkategaia Txerra Molinuevo izango dela. Molinuevok alkatearen makila jaso zuen 2020ko azaroan, Josune Irabienek Eusko Jaurlaritzan ardurak hartu ostean.
Bere ibilbideko zenbait lorpen azpimarratu du alderdiak: pertsonak eta bizitzaren iraunkortasuna lehentasun bilakatzea, parte hartzea sustatzea Amurrioko auzoetako batzarren eta Aurrekontu Parte-hartzaileen bidez, Amurrioko Plan Orokorra aho batez onartu izana, gizarte-inplikazio handiarekin. Nabarmendu dutenez, plan horrek aukera emango du hiri-lurzorua betetzeko, etxebizitza babestuak sustatzeko eta trenbidearen azpiko pasabide bat eraikitzeko.
Amurrioko jeltzaleek batzarrean babestu dute egungo alkatearen hautagaitza eta berak esker hitzak izan ditu. "Erronka horri gogo, ilusio eta proiektu askorekin aurre egingo diola” adierazi du, “Amurrio eta gure bizilagunen bizi-kalitatea hobetzen jarraitzeko”.
Halaber, hurrengo hauteskundeei buruz hitz egin baino, Molinuevok aipatu du indarrean dagoen legealdiari so dagoela: "“EAJ-PNVk hauteskundeetan 2019an aurkeztu zuen hauteskunde-programaren betetze-maila oso positiboa da, eta nire helburua da agintaldian geratzen dena lantzen jarraitzea, aurreikusita dauzkagun proiektuak baino gehiago lortu ahal izateko eta, jakina, Amurrioko herritarrek konfiantza ematen badidate, udalerriaren hobekuntzan aurrera egiten jarraitzeko maila guztietan: soziala, ekonomikoa, urbanistikoa, kulturala eta ingurumenekoa”.