Amurrioko udal gobernuak uko egin dio aurrekontuen negoziaketari, EH Bilduren esanetan

EH Bilduk "larritzat" jo du egoera. / Aiaraldea.eus

Aurrekontuen eztabaidari atea itxi izana leporatu dio EH Bilduk Amurrioko udal gobernuari. Izan ere, EAJren korporazioak uko egin dio koalizio abertzalearekin esertzeari. EH Bilduren iritziz, honakoa ez da 24 milioi euroko kontuak lantzeko modua.

2023ko aurrekontuak osatzeko eztabaidari ateak itxi izana leporatu dio EH Bilduk Amurrioko udal gobernuari. Proposamenak egiteko gonbidapena jaso ostean, aurrekontu-partiden mugak ezagutzeko bilera bat eskatu zuela azaldu du koalizio abertzalea. EAJren udal gobernuak, ordea, uko egin dio bilera horri, EH Bilduk azaldu duenaren arabera, oposizioko taldeak ekarpenik ez duela iritzita.

Udal-aurrekontuek informazioa, gardentasuna, akordioak eta adostasuna behar dituztela uste du opozisioko taldeak, eta "biziki sentitzen" du udal-gobernua koalizioarekin hitz egitera eseri nahi ez izatea. Mariano Alava bozeramailearen hitzetan, “24 milioi euroko kontuak ezin dira horrela landu, inolako azalpenik eman gabe, oposizioaren lana oztopatuz eta oposizioaren indar nagusiarekin akordioa lortzeko inolako borondate politikorik erakutsi gabe”.

Egoera salatzeko plazaratutako oharrean, Amurriorentzako proiektu bat duela nabarmendu du EH Bilduk. Talde politikoaren iritziz, udal gobernuaren jarrerak egoera "larri" batera darama aurrekontuen eztabaida eta EAJ eta PSE-EEri eskatu diete 2021eko aurrekontu-akordioan sinatutakoa betetzea. Akordio horren arabera, hamabost egunera luzatzen zen aurrekontuei zuzenketak egiteko epea.

Akordio horren arabera ere udal gobernuak konpromisoa hartzen zuen 2022ko urria baino lehenago aurrekontuen aurreproiektuaren egoera teknikoaren berri emateko, eta urte amaitu aurretik kontuak bozkatzeko. Gauzak hala, sinatutakoa betetzea eskatu du EH Bilduk. 

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide